სიდას გამგეობის წევრი, PR-ის სპეციალისტი და ჯეპრას კონსულტანტი, კახა მაღრაძე ამბობს, რომ ქალების მიერ ძალადობაში დადანაშაულებული სიდას ხელმძღვანელის, ზვიად დევდარიანის დაცვისას შეცდა. მისი თქმით, ზვიად დევდარიანს არა ჯეპრა, არამედ თვითონ ეხმარებოდა, რადგან "მისი კარიერის დასასრული ნაკლებად დამანგრეველი ყოფილიყო მისთვის და ოჯახისთვის".

"მეგონა რომ კარგ საქმეს ვაკეთებდი, მაგრამ გუშინ, ალბათ ყველაზე ბოლოს, მეც გავიგე სიმართლე, რაც თან პირადად მე მეხებოდა... ამიტომ, ბოდიშს გიხდით ყველას, ვისაც გაგაცანით, როგორც ჩემი მეგობარი და როგორც კარგი ადამიანი! ბოდიშს გიხდით ყველას, ვისაც არ გისმენდით ამდენი წელი და გეუბნებოდით, არ მიაქციოთ ყურადღება, მასეთი ტიპია-მეთქი! ბოდიშს გიხდით ჟურნალისტებსა და იმ ადამიანებს, ვისაც ბოლო დღეებშიც ვუმტკიცებდი მექალთანეა, მაგრამ მოძალადე არაა-მეთქი!", - წერს ფეისბუქში კახა მაღრაძე.

ის ბოდიშს უხდის არასამათავრობო ორგანიზაცია სიდას თანამშრომლებს, რომ უფრო ადრე "არ მიხედა ამ საქმეს" და დასძენს, რომ ორგანიზაციაში ჩატარდება გამგეობის სხდომა და "ყველაფერი დალაგდება".

17 მარტს ზვიად დევდარიანი ქალთა მოძრაობამ ქალების შევიწროების 10-მდე შემთხვევაში დაადანაშაულეს.