გიორგი კვირიკაშვილის განცხადებით, სურამის ფსიქიატრიულ საავადმყოფოში შექმნილი ვითარება საგანგაშოა და სახელმწიფომ მსგავს დაწესებულებებს განსაკუთრებული ყურადღება უნდა მიაქციოს. დღეს, 14 მარტს გამართულ მთავრობის სხდომაზე პრემიერმა მოუწოდა ჯანდაცვის მინისტრ დავით სერგეეენკოს კონტროლის გამკაცრებისკენ.

"სახალხო დამცველის მიერ გამოტანილი ინფორმაცია ჩემთვისაც საგანგაშო იყო... იქ არიან უმწეო ადამიანები. მათ არ ძალუძთ საკუთარი მდგომარეობის შესახებ ასე ღიად საუბარი და ინფორმაციის ჩვენამდე მოტანა და მნიშვნელოვანია, სახელმწიფომ მათ განსაკუთრებული ყურადღება მიაქციოს."

სახალხო დამცველის აპარატის ინფორმაციით, სურამის ფსიქიატრიულ დაწესებულებაში პაციენტები ღირსების შემლახავ პირობებში იმყოფებიან. ომბუდსმენის თქმით, ფსიქიატრიული საავადმყოფოს მთლიანი შენობა როგორც საცხოვრებელი, ასევე საერთო სარგებლობის ტერიტორიები ძველი და გაუმართავია, ძველია ინვენტარიც, უკიდურესად მძიმეა სანიტარულ-ჰიგიენური მდგომარეობა.

გარდა ამისა, სურამის ფსიქიატრიული საავადმყოფოს დირექტორი, ვახტანგ ამირანაშვილი კლინიკის პაციენტებს შეურაცხმყოფელად მოიხსენიებს და მათ ქვეშაფსიებს ეძახის. ამის შესახებ მან თავად უამბო On.ge-ს.

ჯანდაცვის სამინისტროს განცხადებით, სურამის ფსიქიატრიულ საავადმყოფოში "არსებული პრობლემების ოპერატიულად აღმოფხვრისთვის" დროებითი მმართველი დაინიშნება.

სურამის ფსიქიატრიულ დაწესებულებაში არსებული მდგომარეობა წლებია სახალხო დამცველის ანგარიშებში ხვდება. მწვავე იყო 2015 წლის ანგარიშიც, სადაც პაციენტები სამედიცინო პერსონალის მხრიდან განხორციელებულ ძალადობაზე საუბრობენ.