საგარეო საქმეთა მინისტრი, მიხეილ ჯანელიძე მიიჩნევს, რომ NATO-ს სამიტზე მიღებულ კომუნიკეში საქართველოს მიერ მიღწეული პროგრესი დაფიქსირებული იქნება:

"ველოდებით, რომ კომუნიკეში იქნება საქართველოსთან მიმართებაში დაფიქსირებული ის პროგრესი, რომელიც ასევე აისახა ერთობლივ განცხადებაში. ასევე ყველა ის პროგრესი, რომელიც ჩვენ გვაქვს ინსტიტუციური განვითარების კუთხით და დემოკრატიული განვითარების კუთხით და რაც ყველაზე მნიშვნელოვანია, ჩვენ ველოდებით, რომ დაფიქსირდება უცვლელი მხარდაჭერა საქართველოს ნატოს წევრობასთან დაკავშირებით".

ნატოს სამიტი პოლონეთის დედაქალაქში გუშინ დაიწყო და დღეს დასრულდება. მსოფლიო სხვადასხვა ლიდერთან ერთად, ღონისძიებას საქართველოს პრეზიდენტიც ესწრება. სამიტის ფარგლებში, გიორგი მარგველაშვილი, ავღანეთის მისიაში მონაწილე ქვეყნების მთავრობის მეთაურების შეხვედრაზე "მტკიცე მხარდაჭერის მისიის" თემაზე სიტყვით გამოვიდა.

მან ტერორიზმთან ბრძოლაში ნატოს წევრი და პარტნიორი ქვეყნების ძალისხმევაზეც ისაუბრა და აღნიშნა, რომ ტერორიზმის შეკავება საერთო ძალისხმევით მოხდება. მარგველაშვილმა ავღანეთში სამშვიდობო მისიაში საქართველოს როლსაც გაუსვა ხაზი და აღნიშნა, რომ მიუხედავად საქართველოს ტერიტორიების ოკუპაციისა, საქართველო იყო და რჩება ერთ-ერთ მთავარ კონტრიბუტორად, ხოლო ქართველი ხალხის ურყევი ნებაა გახდეს ნატოს წევრი.