თბილისის საქალაქო სასამართლომ 2011-2012 წლებში, სასჯელაღსრულების დეპარტამენტის N8 დაწესებულების პატიმართა წამების, დამამცირებელი და არაადამიანური მოპყრობისთვის ამავე დაწესებულების ორი ყოფილი თანამშრომელი დამნაშავედ სცნო. ამის შესახებ ინფორმაციას საქართველოს პროკურატურა ავრცელებს.

სასამართლო განხილვით დადგინდა, რომ 2011-2012 წლებში, სასჯელაღსრულების დეპარტამენტის N8 დაწესებულებაში მუშაობის პერიოდში, პატიმართა დაშინებისა და უსიტყვო მორჩილების მიზნით, ამავედაწესებულების თანამშრომლების მხრიდან ადგილი ჰქონდა პატიმართა დამცირებას და არაადამიანურ, ღირსებისა და პატივის შემლახავ მდგომარეობაში ჩაყენებას.

განცხადებაში ნათქვამია, რომ მსჯავრდებულები ძალადობრივი მეთოდებით უსწორდებოდნენ პატიმრებს, აყენებდნენ მათ სიტყვიერ და ფიზიკურ შეურაცხყოფას, უსწორდებოდნენ ფიზიკურად, რისი მიზანიც მათი უსიტყვო მორჩილება იყო.

საქართველოს პროკურატურის ცნობით, პატიმრებს უკანონოდ შეზღუდული ჰქონდათ გასეირნების, სატელეფონო საუბრებისა და მიმოწერის უფლება. არ ჰქონდათ სამედიცინო მომსახურებით სარგებლობისშესაძლებლობა, მათ ასევე შეზღუდული ჰქონდათ ძილისთვის და დასვენებისთვის განკუთვნილი დრო.

ასევე დადგინდა, რომ მსჯავრდებულებს პატიმრები საკნიდან თვითნებურად გაყავდათ და დაწესებულების კორპუსში მდებარე აბანოში, ხელკეტებისა და სხვადასხვა საგნებით, ფიზიკურად უსწორდებოდნენ.

მსჯავრდებულებს სასჯელის სახედ და ზომად "ამნისტიის შესახებ" საქართველოს კანონის გამოყენების შემდეგ განესაზღვრა 3 წლით თავისუფლების აღკვეთა, ჯარიმა 2000 ლარის ოდენობით და 1 წლითა და 6 თვის ვადით ჩამოერთვა თანამდებობის დაკავების უფლება.