Ekhokavkaza სამხრეთ ოსეთში დე-ფაქტო პრეზიდენტის წინასაარჩევნო გარემოსთან დაკავშირებით, რუსული პოლიტიკური კონიუნქტურის ცენტრის მიერ გამოქვეყნებული ანგარიშის მიმოხილვას აქვეყნებს და განმარტავს, რომ სამხრეთ ოსეთში დე-ფაქტო საპრეზიდენტო არჩევნებში მოსკოვი იმ კანდიდატებს დაუჭერს მხარს, რომლებიც 2015 წლის შედეგად მიღწეული მეკავშირეობისა და ორი მხარის ინტეგრაციასთან დაკავშირებული მოლაპარაკებების შესრულების მტკიცე გარანტიებს იძლევიან.

ანგარიშის თანახმად, მოსკოვის ფავორიტები ახლანდელი დე-ფაქტო პრეზიდენტი, ლეონიდ თიბილოვი და პარლამენტის სპიკერი, ანატოლი ბიბილოვი არიან. სწორედ ამ ორს შორის მიმდინარეობს ძირითადი ბრძოლაც. რუსეთი იმედს სწორედ თიბილოვსა და ბიბილოვზე ამყარებს, რადგან მათ შეუძლიათ "უზრუნველყონ ერთმანეთთან კონკურენციაში მყოფი კლანების გრძელვადიანი კონსოლიდაცია და შეასრულონ რუსეთის წინაშე 2015 წლის მოლაპარაკებებით აღებული ვალდებულებები".

ანგარიშის ავტორები მიიჩნევენ, რომ მოსკოვს შეუძლია დაარწმუნოს ბიბილოვი, რომ ამ უკანასკნელმა თიბილოვის კანდიდატურას დაუჭიროს მხარი. თუმცა, უფრო მეტად ის სცენარი განიხილება, რომლის თანახმადაც, პრეზიდენტობისათვის ორ მებრძოლს შორის კონკურენცია კანონის ფარგლებში წარიმართება. თუმცა, აღსანიშნავია, რომ თუ თიბილოვი, რაიმე მიზეზით, პრეზიდენტობისთვის ბრძოლაზე უარს განაცხადებს, მოსკოვისათვის მისაღები კანდიდატი ბიბილოვი გახდება.

ანგრიშის თანახმად, აუტსაიდერთა შორის არის ექს-პრეზიდენტი, ედუარდ კოკოითი, რომელსაც რუსეთი დესტაბილიზაციის ფაქტორად განიხილავს და მისი 2017 წლის არჩევნებში მონაწილეობით დაინტერესებული არ არის. გარდა ამისა, მოსკოვის მიერ მიუღებელ კანდიდატებს შორის არიან შინაგან საქმეთა დე-ფაქტო ექს-მინისტრი, დავიდ სანაკოევი და თავისუფალ ჭიდაობაში რუსეთის ნაკრების მთავარი მწვრთნელი, ძამბოლატ ტედეევიც.

ადგილობრივი ექსპერტი, როლანდ კელეხსაევი კი ამბობს, რომ ზემოაღნიშნული ანგარიში რუსეთის მიერ იმის შეხსენებაა, რომ არჩევნები მშვიდ და დემოკრატიულ გარემოში უნდა წარიმართოს:

"ანგარიშში ნათლად წერია, რომ მოსკოვს კოკოითისა და ტედეევის რევანშისტული ზრახვები არ აწყობს".

ანგარიშში ასევე აღნიშნულია, რომ რუსეთი სამხრეთ ოსეთში სტაბილურობის შენარჩუნებით, ორ მხარეს შორის მოკავშირეობისა და ინტეგრაციის შესახებ მოლაპარაკების შესრულებით არის დაინტერესებული:

"კრემლი იმ კანდიდატს, ან კანდიდატთა კოალიციას დაუჭერს მხარს, რომლებიც ზემოაღნიშნული პირობების შესასრულებლად მტკიცე გარანტიებს წარადგენენ".

პოლიტიკური კონიუნქტურის ცენტრი 1992 წელს დაარსებული რუსული კერძო კომპანიაა, რომლის მუშაობის ერთ-ერთი მიმართულება პოლიტიკური ანალიზია. 2000 წლიდან კი რუსეთის პრეზიდენტის ადმინისტრაციასთან თანამშრომლობს.