ბათუმში მშენებარე კორპუსიდან სამშენებლო მასალების გადმოვარდნის შედეგად ორი ადამიანი დაშავდა. მათ შორის ერთი არასრულწლოვანია. ინფორმაციას აჭარის ტელევიზია ავრცელებს.

დაშავებულების ოჯახის განცხადებით, ძლიერი ქარის დროს მშენებლობიდან გადმოყრილმა სამშენებლო მასალებმა სახლის სახურავი ჩაამტვრია, რის შედეგადაც ახალგაზრდა ქალმა და 15 წლის მოზარდმა სხეულის დაზიანებები მიიღეს.

შენობას შპს ელიტმშენი აშენებს. კომპანიის დირექტორის, არჩილ ფარტენაძის თქმით, მშენებლობისთვის საჭირო უსაფრთხოების ბადე შეკვეთილი აქვთ და რამდენიმე დღეში ექნებათ.

ბათუმის მერიის წარმომადგენელი იოსებ შერვაშიძე ამბობს, რომ მშენებარე ობიექტზე უსაფრთხოების ზომები დაცული არ ყოფილა. რაც შეეხება ზარალს მერია კომისიური წესით შეისწავლის, რის შედეგადაც გადაწყდება თუ რა სახის დახმარება ჭირდება დაზარალებულებს. შერვაშიძის თქმით, ამისთვის ოფიციალური მიმართვაა საჭირო.

შინაგან საქმეთა სამინისტროს ინფორმაციით, საქმეზე გამოძიება სისხლის სამართლის კოდექსის 240-ე მუხლით არის დაწყებული. მუხლი სამშენებლო სამუშაოს წარმოებისას უსაფრთხოების წესის დარღვევით ჯანმრთელობის ნაკლებად მძიმე ან მძიმე დაზიანების გამოწვევას გულისხმობს და ისჯება შინაპატიმრობით,ვადით ექვსი თვიდან ორ წლამდე ანდა თავისუფლების აღკვეთით ვადით ორიდან ხუთ წლამდე.