საქართველოს პრეზიდენტმა, გიორგი მარგველაშვილმა მაუწყებლობის შესახებ კანონპროექტს ხელი არ მოაწერა. ცვლილებების მიხედვით, საზოგადოებრივ მაუწყებელს კომერციული რეკლამის დამატებით განთავსების უფლება ექნებოდა და რიგ შემთხვევაში ტენდერის გარეშე მომსახურების შეძენა შეეძლებოდა. ამის შესახებ პრეზიდენტის საპარლამენტო მდივანმა, ანა ნაცვლიშვილმა ბრიფინგზე განაცხადა.

პრეზიდენტს კანონპროექტი ხელმოსაწერად გაეგზავნა, თუმცა გიორგი მარგველაშვილმა კანონში შესატან ცვლილებებს ვეტო დაადო.

პრეზიდენტმა კანონპროექტი მოტივირებული შენიშვნებით უკან დაუბრუნა პარლამენტს. კერძოდ, პრეზიდენტმა მიიჩნია, რომ სარეკლამო ბაზარი ისედაც მილევადია, ყოველწლიურად მცირდება და საზოგადოებრივი მაუწყებლის სიკეთე არ უნდა დაუპირისპირდეს მედიამრავალფეროვნებას. მისი თქმით, გარანტირებული დაფინანსების მქონე მაუწყებლის სარეკლამო ბაზარზე შესვლით მედიაბაზარი დაზარალდება. პრეზიდენტმა ისაუბრა ტენდერის გარეშე მომსახურების შესყიდვაზე.

საქართველოს პარლამენტმა პრეზიდენტის ვეტო დაძლია. პროცედურის თანახმად, ახლა დოკუმენტზე ხელმოწერა და მისი გამოქვეყნება პარლამენტის თავმჯდომარეს, ირაკლი კობახიძეს მოუწევს.