აშშ-ის პრეზიდენტის, დონალდ ტრამპის სიძესა და მრჩეველს, ჯარედ კუშნერს ზოგიერთ სახელმწიფო საიდუმლო დოკუმენტზე წვდომა შეეზღუდა. შეზღუდვა, ასევე, თეთრ სახლში ყოველდღიურ ბრიფინგებს შეეხო.

ადგილობრივი მედიის ცნობით, მისი დაშვების დონემ "სრულიად საიდუმლოდან" "საიდუმლომდე" დაიწია. მსგავსი რეგულაციები თეთრი სახლის სხვა მაღალჩინოსნების მიმართაც გატარდა.

თეთრ სახლში მისვლის შემდეგ კუშნერმა დროებითი წვდომა მიიღო "სრულიად საიდუმლო" დოკუმენტებზე. ამ დროის განმავლობაში ფედერალური საგამოძიებო ბიურო მუდმივი სტატუსისა და სახელმწიფო საიდუმლოებაზე წვდომის შესახებ კუშნერის განაცხადს განიხილავდა.

აშშ-ის პრეზიდენტს უფლება აქვს კუშნერს მუდმივი წვდომა მიანიჭოს, თუმცა ტრამპის თქმის, საბოლოო გადაწყვეტილებას თეთრი სახლის ადმინისტრაციის უფროსი, ჯონ კელი მიიღებს.

თეთრი სახლის პრესსპიკერმა, სარა სანდერსმა განაცხადა, რომ შეზღუდვის მიუხედავად, კუშნერი ადმინისტრაციაში მნიშვნელოვანი როლი ექნება.

ჯარედ კუშნერის ადვოკატმა განაცხადა, რომ დასაშვებობის დონის დაწევა მის საქმიანობას ხელს არ შეუშლის. თუმცა ამერიკული მედიის თქმით, "სრულიად საიდუმლო" ინფორმაციაზე წვდომის შეზღუდვა მის მიერ წარმოებულ მოლაპარაკებებზე აისახება.

პრეზიდენტის სიძის სამუშაო არეალი, ძირითადად, ახლო აღმოსავლეთი და ჩინეთია. მანამდე კუშნერი რუსულ და ჩინურ კომპანიებთან თანამშრომლობაში იყო ეჭვმიტანილი. მას, ასევე, რუსეთთან შეთქმულებაში ადანაშაულებდნენ, თუმცა კუშნერმა ყველა ბრალდება უარყო.