ფინანსთა სამინისტროს საგამოძიებო სამსახურის ცნობით, საქართველოს საბაჟო საზღვარზე 21 კგ-ზე მეტი ოქროსა და ვერცხლის ნაკეთობების გადატანის წესის დარღვევის ბრალდებით, ერთი პირი ამხილეს.

გამოძიების ვერსიით, ბრალდებულმა, სარფის გავლით, საქართველოს საბაჟო საზღვარზე, მალულად, ერთ-ერთი გადამზიდავი კომპანიის კუთვნილ სატვირთო ავტომანქანაში მოწყობილი სამალავებით შემოიტანა არადეკლარირებული საიუველირო ნაკეთობები, მობილური ტელეფონის აქსესუარები და ავტომანქანის სათადარიგო ნაწილები.

უწყება აცხადებს, რომ საგამოძიებო მოქმედებების შედეგად ამოღებულია 21 კგ-ზე მეტი ოქროსა და ვერცხლის ნაკეთობები, რომლის საერთო საბაჟო ღირებულება 191 381 ლარს შეადგენს. ასევე ამოღებულია ჯამში 10 144 ლარის ღირებულების ტელეფონის აქსესუარები და ავტომანქანის სათადარიგო ნაწილები.

გამოძიება მიმდინარეობს საქართველოს სისხლის სამართლის კოდექსის 214-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 5-დან 7 წლამდე ვადით.