პრეზიდენტი, გიორგი მარგველაშვილი აჰმედ ჩატაევთან დაკავშირებით გაკეთებულ განცხადებებს ეხმაურება და განმარტავს, რომ ზოგიერთი პოლიტიკოსი სახელმწიფოსთვის მნიშვნელოვან თემაზე იმაზე მეტს ლაპარაკობს, ვიდრე საჭიროა. ამის შესახებ საზოგადოებას პრეზიდენტის პრეს-სპიკერმა, ეკა მიშველაძემ განუცხადა.

მიშველაძის თქმით, მარგველაშვილს მიაჩნია, რომ როგორც მოქმედი, ასევე ყოფილი ხელისუფლების წარმომადგენლები, მათ შორის უკრაინიდან აკეთებენ ქვეყნისთვის საზიანო განცხადებებს და ამბობენ იმაზე მეტს, ვიდრე საჭიროა. პრეზიდენტის ადმინისტრაციაში აცხადებენ, რომ მსგავსი განცხადებები ქვეყნის საგარეო ინტერესებს აზიანებს.

მარგველაშვილი ადასტურებს, რომ უკრაინა არის ჩვენი ქვეყნის სტრატეგიული პარტნიორი და მეგობრული ურთიერთობებიდან, ასევე დიპლომატიური ეტიკეტიდან გამომდინარე, ის ამ დრომდე თავს არიდებდა უკრაინელი მაღალჩინოსნის, მიხეილ სააკაშვილის საქართველოს სახელმწიფოზე თავდამსხმელი განცხადებების კომენტირებას:

"თუმცა, პრეზიდენტის აზრით, პოლიტიკურ ტაქტსაც აქვს ზღვარი. მაშინ, როდესაც ქართული სახელმწიფო და ქართველი ჯარისკაცები ტერორიზმს ებრძვიან არა მხოლოდ სიტყვებით, არამედ საქმით, მონაწილეობენ საერთაშორისო უსაფრთხოების მისიებში, ანტიტერორისტულ ოპერაციებში, საქართველოს ყოფილი და მოქმედი ხელისუფლების წევრები დაკავებული არიან ერთმანეთისკენ თითის გაშვერით და უსაგნო ურთიერთბრალდებებით".

პრეზიდენტს მიაჩნია, რომ აღნიშნულ პირებს ავიწყდებათ, რომ აქვთ სახელმწიფოს წინაშე პასუხისმგებლობა და საკუთარ პოლიტიკურ დღის წესრიგზე ზრუნვაში ლაპარაკობენ იმაზე მეტს, ვიდრე სათქმელია, რითიც პირველ რიგში ზიანს აყენებენ ქვეყნის სახელმწიფოებრიობას.