თბილისის ერთ-ერთმა კერძო სკოლამ - IB მთიებმა პირველკლასელი ბიჭები სამების საკათედრო ტაძარში რაინდებად აკურთხა. რაინდებად კურთხევის დღესასწაული დავითობას, 8 თებერვალს დაემთხვა.

ბავშვების რაინდებად კურთხევის შესახებ ინფორმაცია ფეისბუკზე გავრცელდა, ინფორმაციას On.ge-სთან საუბრისას ადასტურებს სკოლაც და კლასის ერთ-ერთი მოსწავლის დედაც, რომელსაც სახელისა და გვარის მედიაში გავრცელება არ სურს.

მისი თქმით, სკოლის ადმინისტრაციამ მშობლებს 10 დღით ადრე აცნობა დაგეგმილი ღონისძიების შესახებ და მხოლოდ ის ბავშვები აკურთხეს რაინდებად ვისი მშობელიც თანახმა იყო. იგივე მშობელი ამბობს, რომ სკოლის ინიციატივამ გააკვირვა.

"არც ისეთი სერიოზული [საკითხია], როგორც ხალხმა მიიღო", - აღნიშნა მშობელმა, რომელმაც შვილი რაინდად არ აკურთხებინა.