"ჩვენ ცივილური, ევროპული გაყრის პროცესში ვართ ქართულ ოცნებასთან," - ეს განცხადება პარლამენტის თავჯდომარემ, დავით უსუფაშვილმა გააკეთა და განმარტა, რომ რესპუბლიკელები კოალიციურ პასუხისმგებლობებს ასრულებენ მანამ, სანამ ეს ქვეყანას სჭირდება.

უსუფაშვილის თქმით, რესპუბლიკელი მინისტრები მაშინ დატოვებენ პოსტებს, როდესაც ამას პარტია ან პრემიერმინისტრი გადაწყვეტს:

"რესპუბლიკული პარტიის მინისტრები მთავრობაში არ დატოვებ თანამდებობას რუსეთიდან შემოძახილის ან ქართული რუსეთუმეებისა და ანტინატოელების გამო. ჩვენ განვაცხადეთ, რომ ვარშავის სამიტის შემდეგ შეიძლება მივიღოთ ეს გადაწყვეტილებები".

პარლამენტის ვიცე-სპიკერმა, მანანა კობახიძემ კი განაცხადა, რომ პარლამენტში ყველა პოლიტიკოსი გადადის წინასაარჩევნო რეჟიმში, მათ შორის პარლამენტის თავჯდომარეც:

"ჩვეულებრივ დაიწყება კამპანია, იმ კონკურენციის რეჟიმში, რომელშიც რამდენიმე თვის წინ დაანონსდა. აქ უცხო, ალბათ, არაფერი არ არის".