საქართველოს ფოსტა თბილისის საერთაშორისო კინოფესტივალის ბრალდებებს თვენახევრის შემდეგ პასუხობს. ფოსტის განცხადებაში ვკითხულობთ, რომ მათ კინოფესტივალის 30 გზავნილიდან არცერთი დაუკარგავთ.

"არც ერთი გზავნილი არ არის დაკარგული, ამასთან არც ერთ გზავნილთან მიმართებაში საფოსტო წესების დარღვევას ადგილი არ ჰქონია", - აცხადებენ ფოსტაში.

თბილისის საერთაშორისო კინოფესტივალის დირექტორი გაგა ჩხეიძე On.ge-ს ფილმების დაკარგვის შესახებ 31 დეკემბერს ესაუბრა. ის ამბობდა, რომ საქართველოს ფოსტამ მათ გაგზავნილი ფილმების მეოთხედი დაუკარგა ან უკან დაუბრუნა.

"დაკარგულად ითვლება, როცა არ ვიცით სად არის ორი თვის განმავლობაში. თვითონაც არ იცოდნენ სად იყო, ვერ მუშაობენ კარგად. ერთი გზავნილი ჩააბარეს ერთ თვეში, შვიდ დღეში რომ უნდა ჩაებარებინათ", - უთხრა On.ge-ს საქართველოს ფოსტის განცხადების გავრცელების შემდეგ გაგა ჩხეიძემ.