"სრულიად მიუღებელი, უზნეო და ამორალური ფაქტის მოწმე გავხდით მორიგ ჯერზე.
ჩვენ ყველამ ერთად უნდა ვაჩვენოთ მსგავსი ქმედების მიუღებლობა და შეურიგებლობა. პროტესტი უნდა იყოს ქმედითი. თავდაცვის სამინისტრო და ყველა ჩვენს დაქვემდებარებაში მყოფი სუბიექტი წყვეტს ამ სააგენტოსთან ურთიერთობას. არ შეიძლება, აღარ უნდა დავუშვათ, არ უნდა შევეგუოთ!", - თავდაცვის მინისტრმა თინა ხიდაშელმა ეს განცხადება ფეისბუქში პირად გვერდზე დღეს, 11 მარტს გამოაქვეყნა.

ამ ფაქტს წინ უძღოდა სოციალური ქსელების საშუალებით, სავარაუოდოდ, ქართველი ოპოზიციონერი პოლიტიკოსის პირადი ცხოვრების ამსახველი კადრების გავრცელება. სააგენტო ინტერპრესნიუსმა და ფორტუნამ აღნიშნულის შესახებ ინფორმაცია მაიდენტიფიცირებელი ნიშნების დაფარვის გარეშე გაავრცელეს.

თინა ხიდაშელის მსგავსად, იუსტიციის მინისტრმა თეა წულუკიანმაც განაცხადა, რომ სააგენტოსთან თანამშრომლობას იუსტიციის სამინისტროც წყვეტს.

მთავარმა პროკურატურამ აღნიშნულ ფაქტზე სისხლის სამართლის საქმის გამოძიება დაიწყო სისხლის სამართლის კოდექსის 157-ე მუხლის მეორე ნაწილით. აღნიშნული მუხლი გულისხმობს პირადი ან ოჯახური საიდუმლოს უკანონოდ გამოყენებას, ანდა გავრცელებას ამა თუ იმ ხერხით გავრცელებულ ნაწარმოებში, მასობრივი მაუწყებლობით. ან სხვა საჯარო გამოსვლისას. დამტკიცების შემთხვევაში, დანაშაული ისჯება ჯარიმით ან გამასწორებელი სამუშაოთი ვადით ორ წლამდე, ანდა თავისუფლების აღკვეთით იმავე ვადით.