დაჭრილი დოდო გუგეშაშვილის ოპერაცია დასრულდა. ღუდუშაურის კლინიკის ექიმის განცხადებით მისი მდგომარეობა სტაბილურად მძიმეა:

"სასწრაფოს ექიმების ბრიგადის მიერ მოყვანილია პაციენტი, ცეცხლსასროლი იარაღით მიყენებული ჭრილობით. გულ-მკერდის მარცხენა ნახევარში გამჭოლი ჭრილობა იყო. ჰქონდა ჰემორაგიული შოკი და სუნთქვის მწვავე უკმარისობა, დაუყოვნებლივ აყვანილია საოპერაციო ბლოკში. შემდგომი მკურნალობა გაგრძელდება კრიტიკული მედიცინის დეპარტამენტში."

აფხაზეთის ომის ვეტერანი და ყოფილი მხედრიონელი, დოდო გუგეშაშვილი სახლში ცეცხლსასროლი იარაღით დაჭრეს, მისი შვილი კი მოკლეს. ინციდენტი გუგეშაშვილის სახლში, თბილისში მოხდა.

შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსმა, მამუკა ჭელიძემ განაცხადა, რომ თავდამსხმელი, სავარაუდოდ, დოდო გუგეშაშვილის ოჯახს იცნობდა.

საქმეზე გამოძიება სისხლის სამართლის კოდექსის 109-ე დამამძიმებელ გარემოებაში მკვლელობის მუხლით მიმდინარეობს.