თბილისის მერიის ინფორმაციით, კიდევ ას დევნილ ოჯახს გადაეცა თბილისის ზღვაზე, ე.წ. ოლიმპიურ სოფელში საცხოვრებელი ბინა. აღნიშნულ ოჯახებს ბინების გასაღები თბილისის მერმა, დავით ნარმანიამ და ლტოლვილთა მინისტრმა, სოზარ სუბარმა გადასცეს.

მერიის ცნობით, ბოლო ორი წლის განმავლობაში, თბილისში 17 ნგრევადი ან სიცოცხლისათვის საფრთხის შემცველი ობიექტი დაიხურა და იქ მცხოვრებ ოჯახებს ბინები ახალ კორპუსებში გადაეცათ.

თბილისში ახალაშენებულ კორპუსებში საცხოვრებელი ფართი უკვე 591-მა დევნილმა ოჯახმა მიიღო, მათ შორის 330-მა თბილისის ზღვაზე.

მერიის ინფორმაციით, წლის ბოლომდე ოლიმპიურ სოფელსა და მენაშენეებისგან გამოსყიდულ ახალაშენებულ კორპუსებში ბინის მფლობელი 400 დევნილი ოჯახი გახდება.