აშშ-ს ქალაქ ჯეფერსონვილში ბაპტისტურმა ეკლესიამ ეზოში აბრა განათავსა, წარწერით "შეაჩერე სექსუალური ძალადობა, ჩაიცვი ტანსაცმელი".

იმ ეპოქაში, როცა ძალადობის წინააღმდეგ ისეთი კამპანიები არსებობს, როგორიცაა #metoo და Time's UP, გასაკვირი არაა, რომ ინდიანას შტატში ამ სახის მესიჯის გავრცელებამ ადგილობრივ მოსახლეობაში პროტესტი გამოიწვია.

"მე ორი გოგონა მყავს და როგორც დედა, ამ მესიჯმა საშინლად გამაბრაზა. გამაბრაზა როგორც ქალი და გამაბრაზა როგორც ადამიანი" - ამბობს ადგილობრივი ელისონ კონდრა.

"რამდენად მისაღებია მსგავსი შეხედულება 6 წლის გოგოსთვის, რომელზეც იძალადეს, როცა კიკინები ეკეთა და მოკლე კომბინეზონი ეცვა?" - ამბობს მეორე მოქალაქე, მადილაინ შიპმენი.

ეკლესიის ახლოს მაცხოვრებლების თქმით, პროტესტის შემდეგ ეკლესიამ აბრა ჩამოხსნა, პასტორმა კი ბოდიში მოიხადა:

"ამის გამო თავსაც კი ვერ ვიმართლებ და შეშფოთებული ვარ, რომ იმ ეკლესიამ, რომელშიც მე ვმსახურობ, ეს გამოაქვეყნა. ამ წარწერამ ტკივილი გამოიწვია და არასდროს ვისურვებდი, რომ ჩვენი ეკლესიიდან წამოსულმა რამე სიტყვამ, ადამიანებს ზიანი მიაყენოს. ეს მიუღებელია და ასეთი მესიჯების ადგილი აღარაა".

ბოდიშის მიუხედავად, მოქალაქეები ჯერ კიდევ განრისხებულები არიან.

"არ აქვს მნიშვნელობა რა გაცვია, არავის აქვს უფლება შეგეხოს, როცა შენ ამის წინააღმდეგი ხარ" - ამბობს ერთ-ერთი ადგილობრივი.