ეუთოს საპარლამენტო ასამბლეის პრეზიდენტის პოსტზე ევროპის სახალხო პარტიის მიერ ინიცირებულ კანდიდატს, გიგი წერეთელს ქართული ოცნება მხარს არ უჭერს. დელეგატების ნაწილი კი მიიჩნევს, რომ წერეთლის კანდიდატურა მნიშვნელოვანია არა მხოლოდ საქართველოსთვის, არამედ მთლიანად რეგიონისთვის.

რუმინეთის დელეგაციის წარმომადგენელმა, ვიქტორ პაულ დობრემ ჟურნალისტებთან საუბარში განმარტა, რომ წერეთლის კანდიდატურას მხარს უჭერს და იმედს გამოთქვამს, რომ ის ამ არჩევნებს მოიგებს:

"7 წელია ბატონ წერეთელს ვიცნობ, ასევე ვარ ევროპის სახალხო პარტიის წევრი. მას ჩემი სრული მხარდაჭერა აქვს, ქართული ოცნება კი არ აპირებს მის მხარდაჭერას, მაგრამ ეს შიდაპოლიტიკური საკითხია, რომელშიც არ ვაპირებ ჩავერიო. ევროპის სახალხო პარტიის სახელით შემიძლია ვთქვა, რომ ის სრულიად იქნება ჩვენი მხრიდან მხარდაჭერილი".

ეუთოს საპარლამენტო ასამბლეის 25-ე ყოველწლიური სესია საპარლამენტო ასამბლეის პრეზიდენტის არჩევით დასრულდება. აღნიშნულ პოსტზე ნაციონალური მოძრაობის წევრი, გიგი წერეთელია წარდგენილი, რომელსაც ქართული ოცნება მხარს არ უჭერს და განმარტავს, რომ ვინაიდან 2016 წლის 8 ოქტომბრის საპარლამენტო არჩევნებში ეუთოს საპარლამენტო ასამბლეა ერთ-ერთ მთავარ სადამკვირვებლო მისიას წარმოადგენს, მას ექნება შესაძლებლობა, რაიმე ფორმით გავლენა მოახდინოს არჩევნების შედეგების შეფასებაზე.

ქართული ოცნება ეუთოს საპარლამენტო ასამბლეის პრეზიდენტად გიგი წერეთლის არჩევის წინააღმდეგია