ტაძარში შესულს თუ ოდესმე გიფიქრიათ, რომ ეკლესიისთვის ფული შეგეწირათ, მაგრამ ქეში არ გქონიათ, მაშინ ეს სტატია თქვენთვის არის.

პარიზის წმინდა ფრანსუა დე მოლიტორის სახელობის კათოლიკურ ტაძარში შესაწირების მისაღებად ელექტრონული მოწყობილობები განთავსდება. როგორც ჩანს, ეკლესიის ხელმძღვანელობამ თანამედროვე ტექნოლოგიებს ალღო აუღო და საკუთარ მრევლს შემოწირულობების გასაკეთებლად დამატებითი საშუალება შეუქმნა.

ეკლასიაში დამონტაჟდება ხუთი ციფრული შესაწირი, რომელზეც ადამიანები მიუთითებენ თანხას და ბარათით გადაიხდიან. თითო გადახდაზე მინიმალური თანხა 2 ევრო იქნება, მაქსიმალური კი 10 ევრო. გადახდის შემდეგ, შემომწირველებს მითითებული თანხა ერთ წამში ჩამოეჭრებათ საკრედიტო ბარათებიდან.

ეპარქიის განცხადებით, შემოწირულობები ტაძრის საარსებო წყაროს 79%-ს შეადგენს, მათგან 14% კი სწორედ ხალხის კონტრიბუციას წარმოადგენს, რაც წელიწადში, საშუალოდ, მრევლის ერთ წევრზე 98 ევროს ოდენობის შემოწირულობას უდრის.

„ჩვენი ტაძარი მოწადინებულია, რომ ადამიანებს თანამედროვე გამოწვევებში ფეხი აუწყოს და მის საქმიანობაში ტექნოლოგიების დანერგვა დაიწყოს. მათ შორის არის საკრედიტო ბარათით და აპლიკაციით შემოწირულობების გაკეთების სისტემაც“, - ამბობს ტაძარი მის მიერ გავრცელებულ განცხადებაში.