ჰოლივუდის დიდების ხეივანში, როგორც წესი, მხოლოდ შოუბიზნესის პოპულარულ და ძალიან წარმატებულ წარმომადგენლებს უხსნიან ვარსკვლავს, თუმცა ამერიკას სწორედ იმიტომ ეძახიან ოცნების ქვეყანას, რომ იქ ყველაფერი შესაძლებელი ხდება.

ამის დასტური ქართველი მსახიობი გიორგი დარჩიაშვილია, რომელმაც სულ რაღაც 50 დოლარად ოცნება აიხდინა.

რამდენიმე დღის წინ, ლოს-ანჯელესში პირველად გათამაშდა ე.წ. ბედის ლატარეა, რომელში გამარჯვებულსაც ჰოლივუდის დიდების ხეივანში ვარსკვლავს გაუხსნიდნენ.

მასშტაბურ ლატარეაში დაახლოებით 8 ათასი ადამიანი მონაწილეობდა, მათ შორის გიორგი დარჩიაშვილიც, გამარჯვება კი სწორედ მას ერგო.

On.ge-სთან საუბარში, დარჩიაშვილი ყვება, რომ ყველაფერი შემთხვევით მოხდა, როცა ერთ ჩვეულებრივ დღეს თავისუფალ დრო გამონახა და ჰოლივუდის ბულვარზე სასეირნოდ გავიდა.

"მე თვითონაც გაოგნებული ვარ. წარმოდგენა არ მქონდა თუ ასეთი ლატარეა თამაშდებოდა. ჰოლივუდის ბულვარზე ვსეირნობდი, სადაც დიდი რიგი დავინახე. თავიდან ვერ გავიგე რა ხდებოდა, შემდეგ მითხრეს, რომ 50 დოლარად შემეძლო ბილეთის შეძენა, გამარჯვებულს კი ვარსკვლავს გაუხსნიდნენ. თავიდან ხუმრობა მეგონა, მაგრამ მაინც გადავიხადე ეს თანხა. მერე გავიგე, რომ რამდენიმე ათასი ბილეთი გაიყიდა და მისი პირველი გამარჯვებული, საბედნიეროდ, მე აღმოვჩნდი. ასე უბრალოდ თუ მოხდებოდა ეს ყველაფერი, ნამდვილად არ წარმომედგინა. ვფიქრობ, ასეთი ჟესტით ისინი "უბრალო" ხალხის მიმართ თავის პატივისცემას გამოხატავენ. როგორც მითხრეს, ახლა ოფიციალურ წერილსა და რაღაც კითხვარს გამომიგზავნიან დიდების ხეივნის ოფიციალური წარმომადგენლები", - ყვება On.ge-სთან გიორგი დარჩიაშვილი.

ფოტო: გიორგი დარჩიაშილი

გიორგი დარჩიაშვილმა თეატრალური ინსტიტუტი თბილისში დაამთავრა. მოგვიანებით მსახიობი საცხოვრებლად ამერიკაში გადავიდა, სადაც FBI-ს საოფიცრო კურსი დაამთავრა და დღეს ბევერლი ჰილზის ერთ-ერთი საიუველირო მაღაზიის დაცვის უფროსია.