გერმანიის საგარეო საქმეთა მინისტრმა ფრანკ ვალტერ შტაინმაიერმა, რუსთავი 2-ის თარგმანის მიხედვით, სავიზო ლიბერალიზაციაზე საუბრისას თქვა რომ ეს პროცესი ძალიან ხანგრძლივი იყო, ახლა კი მთლიან ევროპულ კონტექსტში, ევროპულ გადაწყვეტილების მიღებაშია ჩართული:

"მაქსიმალურს ვაკეთებთ, რომ საქართველოსთვის უვიზო მიმოსვლა რაც შეიძლება სწრაფად მივიღოთ. ეს ევროპარლამენტის გარკვეულ ფორმალობებზეა დამოკიდებული და გერმანიის გადასაწყვეტი მხოლოდ ეს საკითხი არ არის".

ამიშ შესახებ, გერმანიის საგარეო საქმეთა მინისტრმა, მიხეილ ჯანელიძესთან ერთად გამართულ ერთობლივ ბრიფინგზე ისაუბრა.

შტაინმაიერის თქმით, სექტემბრის ბოლოსთვის ვიზალიბერალიზაციის პროცესი ლოგიკურ დასასრულამდე უნდა მივიდეს:

"ვიცი რომ საქართველოში უდიდესი მოლოდინია სავიზო ლიბერალიზაციის მიმართ და აქაც მინდა ცალსახად ვთქვა რომ ძალიან ხანგრძლივი პროცესი იყო ეს და საქართველომ უდიდესი ნაბიჯები გადადგა წინ. ამას ვაფასებ გამოკვეთილად. ვიზალიბერალიზაციის საკითხი არ არის - იქნება თუ არა, არამედ როდის - ერთადერთი ეს საკითხია".

გერმანიის საგარეო საქმეთა მინისტრის თქმით, კრიმინალის კუთხით მათმა ქვეყანამ უკვე მოახდინა რეაგირება, ახლა კი შეჩერების მექანიზმზეა მხოლოდ საუბარი, რომელიც ევროპარლამენტმა მალე უნდა დაამტკიცოს:

"ეს უახლოესი კვირების განმავლობაში უნდა დასრულდეს, ყოველ შემთხვევაში საკონსულტაციო პროცესი გრძელდება".