დღეს, 15 იანვარს, კლუბ ბასიანის დაცვის წევრების დაჭრაში ბრალდებული თ.ქ. თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა. პროკურატურა პირისთვის აღკვეთის ღონისძიებად პატიმრობას ითხოვდა და საჩივრით სააპელაციო სასამართლოს მიმართა.

ბასიანის წარმომადგენლის, ნაჯა ორაშვილის ინფორმაციით, მას შემდეგ, რაც 13 იანვარს თავდამსხმელი კლუბში არ შეუშვეს, მან კლუბის დაცვის უფროსს და დაცვის წევრებს რამდენიმე ჭრილობა მიაყენა. მისივე თქმით, ბრალდებულმა ჭრილობები მიაყენა დიდუბე-ჩუღურეთის სამმართველოს განყოფილების უფროსის მოადგილესაც:

"სამი დღე ვდუმდი. იმედი მქონდა საქართველოს სასამართლო სისტემაში არსებობდა იოტისოდენა სამართალი, მაგრამ დღეს დილით მოსამართლემ სამი უმძიმესი მუხლით ბრალდებული ადამიანი გირაოთი გაათავისუფლა! - გირაოთი გაათავისუფლა პოტენციური მკვლელი, რომელიც ქუჩაში დადის. ოჯახი კმაყოფილია, დაგვიმტკიცეს რომ მათი პრივილეგიებიები საქართველოს კონსტიტუციაზე და ზოგადად, ჭეშმარიტებაზე მაღლა დგას", - წერს ორაშვილი Facebook-ზე.

ნაჯა ორაშვილი აცხადებს, რომ ბოლომდე იბრძოლებს და არავის შეარჩენს დაცვის წევრებზე ძალადობას:

"ამ საქმეს ბოლომდე მივიყვან, მაგრამ თქვენ, ფინანსებს და სტატუსს ამოფარებულო ოჯახის წევრებო და სასამართლო სისტემავ, თქვენ უნდა გრცხვენოდეთ, რომ სამართალი ფეხქვეშ გათელეთ. ახლა არ შეილახა პოლიციელის მუნდირი?"

გამოძიება სისხლის სამართლის კოდექსის 117-ე, 118-ე და 353-ე მუხლებით მიმდინარებს, რაც ჯანმრთელობის განზრახ მძიმე დაზიანებას, ჯანმრთელობის განზრახ ნაკლებად მძიმე დაზიანებასა და საზოგადოებრივი წესრიგის დამცველისთვის წინააღმდეგობის გაწევას გულისხმობს.