ქართული კინოს წარმატებებზე საერთაშორისო გამოცემები სულ უფრო ხშირად და უფრო პოზიტიურ სტატიებს წერენ. ამბობენ, რომ ჩვენს ეროვნულ კინემატოგრაფს მეორე სუნთქვა გაეხსნა და მიუხედავად იმისა, რომ ხშირად სიუჟეტური ხაზი კვლავ აფხაზეთის ომის თემატიკის გარშემო ტრიალებს, მაინც მომრავლდა სოციალური დრამები.

მაგალითისთვის შეგვიძლია ნანა ექვთიმიშვილისა და სიმონ გროსის ჩემი ბედნიერი ოჯახი ავიღოთ, რომლის დისტრიბუციის უფლებაც ნეტფლიქსმა იყიდა, ამავდროულად მოხვდა The Wrap-ისა და The Playlist-ის 2017 წლის საუკეთესო ფილმებს შორის.

თავად ნანა და სიმონი კი The New York Times-მა იმ ცხრა საუკეთესო რეჟისორს შორის დაასახელა, რომელთა ფილმებსაც აუცილებლად უნდა უყუროთ.

2018 წელი ქართული კინოსთვის მნიშვნელოვანი და საინტერესო წელი იქნება, რადგან ეკრანზე რამდენიმე საინტერესო სურათი გამოდის.

ანტონი - ზაზა ურუშაძე

მწარმოებელი ქვეყანა: საქართველო, უკრაინა, აშშ.
ჟანრი: ისტორიული დრამა
რეჟისორი: ზაზა ურუშაძე
სცენარის ავტორი: დეილ აისლერი, ზაზა ურუშაძე
პროდიუსერები: მირზა დავითაია, ვლადიმერ ფილიპოვი, ფრენკ მეიორი
მსახიობები: ნატალია რიუმინა, სიმსონ ბუბელ, ნიკიტა შლუნჩაკ, მიკიტა დზიად, ანტონ სებასტიან, ვლადიმერ ლევიცკი, ტატიანა გრაჩიკ.

ფილმის სიუჟეტი 1918 წელს ვითარდება და ის მეგობრებზე მოგვითხრობს, რომლებმაც ომის მიუხედავად ურთიერთობა შეინარჩუნეს. ისტორიული ჟანრის ფილმი ოქტომბრის გადატრიალების შემდგომ პერიოდს ასახავს, როდესაც ბოლშევიკებმა უკრაინელების მიმართ რეპრესიები განახორციელეს. ფილმი გერმანულ სოფელზე და მათ მცხოვრებლებზე გვიამბობს. სოფელში უკრაინელები და გერმანელები ერთად ცხოვრობენ.

ჰორიზონტი - თინათინ ყაჯრიშვილი

მწარმოებელი ქვეყანა: საქართველო, შვედეთი
ჟანრი: დრამა
რეჟისორი: თინათინ ყაჯრიშვილი
სცენარის ავტორები: თინათინ ყაჯრიშვილი, დათო ჩუბინიშვილი
მსახიობები: ია სუხიტაშვილი, გიორგი ბოჭორიშვილი, სოსო გოგიჩაიშვილი, ნანა დათუნაშვილი, ჯანო იზორია, ლიკა ოყროშიძე

"თინამ სცენარის შესახებ ჯერ კიდევ გასულ სექტემბერს მიამბო, იმდენად საინტერესო სცენარი იყო, რომ მოწონება ვერ დავფარე და წარმატებები ვუსურვე. ორი თვის შემდეგ დამირეკა და მასთან მისვლა მთხოვა, ასე დაიწყო ჰორიზონტის რეპეტიციები. საკმაოდ საინტერესო პროცესი იყო მასთან მუშაობა, უფრო უახლოვდები, სიღრმისეულად არკვევ დეტალებს. პირველ თებერვალს დავიწყეთ გადაღებები და ძირითადად ფოთში, ქობულეთში, ბათუმსა და თბილისში გვიწევდა მოძრაობა. არ შემიძლია არ აღვნიშნო მხატვრების საოცარი ნამუშევარი, რადგან ჩემთვის დიდი მნიშვნელობა აქვს ატმოსფეროს სადაც თამაში მიწევს. ეს იყო არაჩვეულებრივი ჯგუფი, რომელთან მუშაობაც მომიწია და რაც მთავარია რეჟისორი, რომელიც შენთან, შენს პერსონაჟთან ერთად გადის მთელს გზას. საკმაოდ საპასუხისმგებლო როლი იყო, თუმცა დეტალებისგან და სიუჟეტის მოყოლისგან თავს შევიკავებ. უნდა აღვნიშნო, რომ ეს როლი ძალიან ემოციური იყო. ჩემი პერსონაჟი ერთი შეხედვით ლამაზი, უზრუნველყოფილი, მხიარული, თითქოს პრინციპული, მაგრამ საკმაოდ ტრაგიკული პიროვნებაა", - ამბობს მთავარი როლის შემსრულებელი, ია სუხიტაშვილი On.ge-სთან საუბრის დროს.

ხიდი - ერეკლე ბადურაშვილი

ერეკლე ბადურაშვილის ფილმში მთავარ როლებს თურქი მსახიობი მურატ ილდირიმი და ქართველი მომღერალი, ნინი ბადურაშვილი ასრულებენ.

ფილმის სიუჟეტი თურქი ბიზნესმენის ჯემალის გარშემო ვითარდება, რომელიც ერთ დღეს მისი მამის დღიურს აღმოაჩენს. ჯემალს საკუთარი მამა სძულდა, თუმცა დღიურიდან ბევრ საინტერესო ისტორიას იგებს და მიხვდება, რომ ყველაფერი ისე მარტივად არ იყო, როგორც ის ფიქრობდა. დღიურში დამალული საიდუმლოებები მას საქართველოში ჩამოიყვანს, რაც მის ცხოვრებას სამუდამოდ შეცვლის.

აღლუმი - ნინო ჟვანია

რეჟისორი: ნინო ჟვანია
სცენარის ავტორი: ირაკლი სამსონაძე
პროდიუსერები: ნიკოლოზ აბრამაშვილი, რუსუდან გლურჯიძე
მსახიობები: გუგა კოტეტიშვილი, გოგა პიპინაშვილი, არჩილ ქიქოძე

ფილმის სიუჟეტი სამი ბავშვობის მეგობარზე მოგვითხრობს, რომლებიც შემთხვევით ხვდებიან ერთმანეთს. ეს არის ამბავი ციხიდან ახლად გამოსული უიღბლო კრიმინალზე, ქუჩის მხატვარსა და ავანტურისტ, მექალთანე მსახიობზე.

მეზობლები - გიგიშა აბაშიძე

რეჟისორი: გიგიშა აბაშიძე
სცენარის ავტორი: გიგიშა აბაშიძე, სოსო ბლიაძე
პროდიუსერი / კო-პროდიუსერი: ლაშა ხალვაში, თინათინ ყაჯრიშვილი, სვეტოზარ რისტოვსკი
მსახიობები: თორნიკე გოგრიჭიანი, ია სუხიტაშვილი, გიორგი ბოჭორიშვილი, ნინო ქორიძე, თემურ ჭიჭინაძე, ეკა მჟავანაძე, დათო როინიშვილი, ნატალია ყულოშვილი, გიორგი გრძელიძე, თამარ ბუხნიკაშვილი, გიორგი გოგიშვილი, ქეთი ჩაჩუა, მალხაზ აბულაძე, მარლენ ეგუტია, გიორგი ბახუტაშვილი, დათო დარჩია.

ფილმის სიუჟეტი იტალიურ ეზოში ვითარდება, სადაც ყველა მეზობელს თავისი ოცნები აქვს და თავისი გზები ამ ოცნებების ასასრულებლად. ერთ დღესაც, გამოჩდება ინვესტორი და მეზობლებს ეზოს გაყიდვას მოთხოვს, რაც მეზობლებს ერთმანეთზე გადაკიდებს.

ურსუსი - ოთარ შამათავა

რეჟისორი: ოთარ შამათავა
სცენარის ავტორი: ზაზა ბუაძე, ოთარ შამათავა
პროდიუსერები: ოლეგ შერბინა, იულია ჩერნიავსკაია, ოთარ შამათავა, სტელიოს ზიანის, ვერა ველტ, პავლინა ჟელევა, გიორგი ჩოლაკოვ
მსახიობები: ნიკა თავაძე, ბოგდან ბენიუკ, ჟოზეფინ დე ლია ბომ, ჟორჟ კორაფას, ილკა ზაფიროვა, კრისტიან ულმენ.

ფილმი მოგვითხრობს ამბავს იმ კაცზე, რომელიც დათვად გარდაისახა, რომ თავისუფლება მოეპოვებინა.