ქართველი რეჟისორი თინათინ ყაჯრიშვილი ახალ ფილმზე მუშობს, რომელშიც მთავარ როლებს ია სუხიტაშვილი, გიორგი ბოჭორიშვილი და ჯანო იზორია ასრულებენ. გადაღებები ძირითადი პალიასტომზე, ერთ-ერთ კუნძულზე მიმდინარეობდა.

"გადაღებებს რაც შეეხება ძლივს გადავრჩით. ძირითადად ან წყალში ვიღებდით ან წყლის ნაპირზე, -10 გრადუსში. გვათოვდა და გვაწვიმდა. გათოვდა პალიასტომზე და გაყინულ ტბაში მოუწიათ ღამით ცურვა გიორგი ბოჭორიშვილს და ჯანო იზორიას. ამ ყველაფერს საინტერესო აღმოჩენებიც ახლდა, ვიპოვე ადამიანები, ვისთან ერთადაც არაფრის შემეშინდება, მსახიობები, მხატვრები, ოპერატორი, რომლებმაც თავდაუზოგავი შრომით შექმნეს ეს პატარა სამყარო ტორფის კუნძულზე რომელსაც ჰორიზონტი დავარქვით. ახლა უფრო მეტ პასუხისმგებლობას ვგრძნობ, ამდენი ადამიანის თავდადება რომ არ დაიკარგოს და ერთ ფილმად შეიკრას", - უთხრა On.ge-ს თინათინ ყაჯრიშვილმა

ფილმში მთავარ როლს ია სუხიტაშვილი ასრულებს.

"თინამ სცენარის შესახებ ჯერ კიდევ გასულ სექტემბერს მიამბო, იმდენად საინტერესო სცენარი იყო, რომ მოწონება ვერ დავფარე და წარმატებები ვუსურვე. ორი თვის შემდეგ დამირეკა და მასთან მისვლა მთხოვა, ასე დაიწყო ჰორიზონტის რეპეტიციები. საკმაოდ საინტერესო პროცესი იყო მასთან მუშაობა, უფრო უახლოვდები, სიღრმისეულად არკვევ დეტალებს. პირველ თებერვალს დავიწყეთ გადაღებები და ძირითადად ფოთში, ქობულეთში, ბათუმსა და თბილისში გვიწევდა მოძრაობა. არ შემიძლია არ აღვნიშნო მხატვრების საოცარი ნამუშევარი, რადგან ჩემთვის დიდი მნიშვნელობა აქვს ატმოსფეროს სადაც თამაში მიწევს. ეს იყო არაჩვეულებრივი ჯგუფი, რომელთან მუშაობაც მომიწია და რაც მთავარია რეჟისორი, რომელიც შენთან, შენს პერსონაჟთან ერთად გადის მთელს გზას. საკმაოდ საპასუხისმგებლო როლი იყო, თუმცა დეტალებისგან და სიუჟეტის მოყოლისგან თავს შევიკავებ. უნდა აღვნიშნო, რომ ეს როლი ძალიან ემოციური იყო. ჩემი პერსონაჟი ერთი შეხედვით ლამაზი, უზრუნველყოფილი, მხიარული, თითქოს პრინციპული, მაგრამ საკმაოდ ტრაგიკული პიროვნებაა. თიკოს დიდი წარმატებას ვუსურვებ, მისი გამარჯვება ჩვენი, ყველას გამარჯვებაა", - ამბობს ია სუხიტაშვილი On.ge-სთან საუბრის დროს.

ეს თინათინ ყაჯრიშვილის მეორე სრულმეტრაჟიანი მხატვრული ფილმია, მისი პირველი ფილმი პატარძლები არაერთი პრიზის მფლობელი გახდა, მათ შორის არის სარაევოს მე-20 კინოფესტივალი, რომელზეც კინოსურათმა ორი პრიზი მიიღო.

ფილმი საქართველოსა და შვედეთის კოპროდუქციაა.