პრემიერმა გიორგი კვირიკაშვილმა მუსლიმი თემის წარმომადგენლებს იფთარზე უმასპინძლა და მათ რამაზანის თვე მიულოცა.

პრემიერ მინისტრის მიერ გამართულ იფთარს თურქეთის საგანგებო და სრულუფლებიანი ელჩი საქართველოში ზექი ლევენთ გუმრუქჩუ და თურქმენეთის საგანგებო და სრულუფლებიანი ელჩი საქართველოში დოვლეთმურად მურატოვი დაესწრნენ.

სიტყვით გამოსვლისას გიორგი კვირიკაშვილმა კიდევ ერთხელ გამოთქვა სამძიმარი თურქეთში მომხდარი ტერორისტული აქტის გამო. მისი თქმით, ტერორიზმი კაცობრიობის საერთო მტერია, რომელსაც არა აქვს ეროვნება და რელიგია.

"სამწუხაროა, რომ დღეს მიწევს ასეთ უმძიმეს თემაზე საუბარი. ეს იყო უსასტიკესი შეტევა ჰუმანურობის წინააღმდეგ, ჩვენს მოძმე თურქეთში სრულიად უდანაშაულო ადამიანები დაიხოცნენ. ტერორიზმს არა გააჩნია არც ეროვნება, არც რელიგია და, სამწუხაროდ, არც საზღვრები. დღეს მსოფლიო აღარ არის ისეთი უსაფრთხო, როგორიც იყო ცოტა ხნის წინ. ტერორიზმი ჩვენი საერთო მტერია და ჩვენ-ცივილიზებული კაცობრიობა ერთად უნდა დავდგეთ, რომ ეს უმწვავესი გამოწვევა დავძლიოთ."

პრემიერ-მინისტრმა საქართველოში საუკუნეების მანძილზე ქრისტიანული და მუსლიმი სამყაროს მშვიდობიან და მეგობრულ თანაარსებობაზე ისაუბრა, რაც მისი თქმით, იშვიათი მოვლენაა მსოფლიოში:

"საუკუნეების მანძილზე საქართველოს მიწაზე მშვიდობიანად თანაარსებობს ქრისტიანული და მუსლიმანური სამყარო, მათ შორის მუსლიმანური სამყაროს სხვადასხვა მიმდინარეობები და ეს მართლაც სამაგალითოა მთელი მსოფლიოსთვის."