რუსული სამთავრობო საინფორმაციო სააგენტო Ria Novosti-ს ინფორმაციით, რუსეთის პრეზიდენტმა, ვლადიმერ პუტინმა განაცხადა, რომ დაავალებს მთავრობას აღადგინოს ორმხრივი თანამშრომლობა თურქეთის შესაბამის ორგანოებთან სავაჭრო-ეკონომიკურ და სხვა სფეროებში.

კრემლის ინფორმაციით, თურქეთის ხელისუფლებამ უნდა გადადგას დამატებითი ნაბიჯები იმისთვის, რომ რუსეთის მოქალაქეების უსაფრთხოება დაიცვას.

რუსეთსა და თურქეთს შორის ურთიერთობა 2015 წლის ნოემბერში მას შემდეგ დაიძაბა, როდესაც თურქულმა თვითმფრინავმა რუსული ბომბდამშენი სირიაში ჩამოაგდო. სწორედ აღნიშნულის შემდეგ შემოიღო რუსეთმა თურქეთთან ურთიერთობაში ეკონომიკური შეზღუდვები. კერძოდ, აკრძალვის ქვეშ მოექცა ჩარტერული თვითმფრინავები, რუსულ ტუროპერატორებს კი განუცხადეს, რომ თურქეთის მიმართულებით აღარ ემუშავათ.

შედეგად, თურქეთის ეკონომიკამ მილიარდობით დოლარი დაკარგა, რადგან რუსი ტურისტების რაოდენობა 79%-ით შემცირდა.

პირდაპირი მოლაპარაკებები ორი ქვეყნის ლიდერს შორის მას შემდეგ გახდა შესაძლებელი, რაც თურქეთის პრეზიდენტმა პუტინს წერილი მისწერა, რომელშიც ბომბდამშენის ჩამოგდების გამო მოუბოდიშა და გარდაცვლილი პილოტის გარდაცვალების გამო მწუხარება გამოხატა.