კალათბურთის თამაშების ჩაწყობის ბრალდებით სახელმწიფო უსაფრთხოების სამსახურის ანტიკორუფციულმა სააგენტომ ხუთი პირი დააკავა.

გამოძიების მტკიცებით, კლუბ სოხუმის მწვრთნელი, ვაჟა კვარაცხელია და კლუბის თანამფლობელი თემურ დათიკაშვილი საერთაშორისო კატეგორიის მსაჯების, ზაზა მაჩალაძის, ირაკლი ბერიშვილისა და დავით ბერიშვილის დახმარებით, თანხის სანაცვლოდ საქართველოს საკალათბურთო ჩემპიონატის სუპერლიგის სხვადასხვა მატჩებში სასურველი შედეგს აფიქსირებდნენ:

"2017 წლის 15 და 16 დეკემბერს გაიმართა საკალათბურთო ჩემპიონატის სუპერლიგის სამი შეხვედრა, რომლებიც დასრულდა წინასწარ შეპირებული ქულათა სხვაობით, რის შემდეგაც თემურ დათიკაშვილი, ვაჟა კვარაცხელია, ზაზა მაჩალაძე, დავით ბერიშვილი და ირაკლი ბერიშვილი დაეუფლნენ მოთხოვნილ თანხას, საერთო ჯამში 36 000 ლარს."

გამოძიება სსკ-ის 221-ე მუხლის მეოთხე ნაწილის ა ქვეპუნქტით მიმდინარეობს, რაც ჯგუფურად კომერციული მოსყიდვას გულისხმობს და სასჯელის სახით 4-დან 6 წლამდე თავისუფლების აღკვეთას ითვალისწინებს.