2018 წელი ლიტერატურის მოყვარულთათვის კარგად დაიწყო. ბაკურ სულაკაურის გამომცემლობამ, ლიტერატურული ოდისეას სერიას კიდევ სამი წიგნი დაამატა და მკითხველს მორიგი დიდებული საჩუქარი გაუკეთა. ახალ წიგნებს შორის არის მებრძოლთა კლუბის ავტორის, ჩაკ პალანიკის მორიგი რომანი ხრჩობა. პალანიკთან ერთად, წიგნის თაროებზე ჰალდორ ლაქსენსის თევზის კონცერტი და რიჩარდ ფლენეგანის ვიწრო გზა შორეული ჩრდილოეთისკენ გამოჩნდება.

1. ჩაკ პალანიკი - ხრჩობა

ბაკურ სულაკაურის გამომცემლობამ მებრძოლთა კლუბის ავტორის, ჩაკ პალანიკის კიდევ ერთი წარმატებული წიგნი თარგმნა. ქართველ მკითხველს შესაძლებლობა აქვს ოცდამეერთე საუკუნის ერთ-ერთი ყველაზე ეპატაჟური ავტორის მორიგ ნაშრომს, ხრჩობას გაეცნოს.

პალანიკმა არც ამ წიგნში უღალატა თავის ჩვეულ ტრადიციას და მორიგი ანტაგონისტი პერსონაჟები შექმნა. ვიქტორ მანჩინი ახალგაზრდა მამაკაცია, რომელიც სამედიცინო უნივერსიტეტს ტოვებს, რათა მოხუცთა თავშესაფარში მცხოვრებ დედას მომვლელის ფული გადაუხადოს. ფულის საშოვნელად ვიქტორი გენიალურ აფიორას გამოიგონებს და თავი ასე გააქვს. რომანის მეორე პერსონაჟი დენია, რომელსაც კრიტიკული პიროვნული აშლილობა და სექს-დემოკიდებულება აღენიშნება. როგორია ორი მარგინალური პერსონაჟის ცხოვრება თანამედროვე სამყაროში, ამას მხოლოდ წიგნიდან გაიგებთ.

ჩაკ პალანიკის ხრჩობა გამოირჩევა მაღალი ხარისხის სარკაზმითა და ავტორისთვის დამახასიათებელი წერის სტილით.

2. ჰალდორ ლაქსენსი - თევზის კონცერტი

თევზის კონცერტი ნობელის პრემიის ლაურეატის, ჰალდორ ლაქსენსის გამორჩეული წიგნია. რომანი ავტორისთვის დამახასიათებელი ენაკვიმატობით, მსუბუქი ირონიისა და შავი იუმორის ოსტატური ნაზავით არის დაწერილი.

რომანის მთავარი გმირი ობოლი ალფგრიმურია, რომელიც მის აღმზრდელებთან, მოხუც წყვილთან ერთად ცხოვრობს. ალფგრიმურის ოცნება მისი აღმზრდელი ბაბუის მსგავსად, მეთევზეობაა, თუმცა ყველაფერი მაშინ იცვლება, როცა ისლანდიის უდიდეს სუპერვარსკვლავს, ოპერის მომღერალ გარდარ ჰოლმს შეხვდება. სწორედ მისი გამოჩენის შემდეგ იცვლება ალფგრიმურის ცხოვრება. რომანის სიუჟეტური ხაზი მოულოდნელობებით სავსეა, რაც მკითხველს წიგნის ბოლო ფურცლებამდე თვალის მოწყვეტის საშუალებას არ აძლევს.

ჰალდორ ლაქსნესი გასული საუკუნის ერთ-ერთი ყველაზე ავტორიტეტული მწერალია, რომელმაც კარიერა 17 წლის ასაკში დაიწყო. ცხოვრების განმავლობაში ლაქსნესმა 60-მდე წიგნის გამოცემა მოასწრო. მწერლის შემოქმედებამ ნობელის პრემიაც დაიმსახურა ლიტერატურის დარგში.

3. რიჩარდ ფლენეგანი - ვიწრო გზა შორეული ჩრდილოეთისკენ

21-ე საუკუნის გამოჩენილი ავსტრალიელი ავტორისთვის, რიჩარდ ფლენეგანისთვის, ვიწრო გზა შორეული ჩრდილოეთისკენ რიგით მეექვსე წიგნია. წიგნმა დადებითი კრიტიკული შეფასება გამოსვლისთანავე მიიღო და შედეგად, 2014 წელს ბუკერის ჯილდოც მოიპოვა.

რომანში ავსტრალიელი ექიმის, დორიგო ევანსის ისტორიაა მოყოლილი. ის შეპყრობილია ბიძამისის ცოლზე სასიყვარულო ფიქრებითა და ომის დროს პატიმრობაში ყოფნის პერიოდის გახსენებით. ომიდან ექიმი დორიგო ევანსი გმირის სახელით ბრუნდება, თუმცა მას მაინც ტანჯავს საკუთარი დამარცხებებისა და დანაშაულის გრძნობა.

რომანის სახელი ავტორმა მეჩვიდმეტე საუკუნის ცნობილი პოეტისგან, მაცუო ბაშოსგან ისესხა. წიგნი იმითაც გამოირჩევა, რომ ის კარგად ასახავს 1943 წელს ბურმას რკინიგზის ინციდენტს, ომის დროინდელ ქრონიკებსა და მისი დასრულების შემდეგ სხვადასხვა ეროვნების ადამიანების ცხოვრებას. რომანი გაჯერებულია როგორც ომის აღწერით, ისე სიყვარულის უსაზღვრო პასაჟებით.

როგორც ხედავთ, ბაკურ სულაკაურის გამომცემლობამ იზრუნა, რომ ზამთარი საინტერესოდ გაატაროთ. სამივე წიგნი უკვე იყიდება წიგნის მაღაზიებში და ის ნებისმიერი მსურველისთვის ხელმისაწვდომია.