საქართველოს შინაგან საქმეთა სამინისტროს თანამშრომლებმა სამცხე-ჯავახეთში, კარწახის რკინიგზის მშენებარე სადგურიდან, საყოფაცხოვრებო ნივთებისა და ელექტროტექნიკის ქურდობის ბრალდებით სამი პირი დააკავეს. უწყების პრესსამსახურში აღნიშნავენ, რომ დაკავებულები ნივთებს სისტემატიურად იპარავდნენ.

"სამართალდამცველებმა, ე.ა.-ს საცხოვრებელი სახლის ჩხრეკისას, დანაშაულებრივი გზით მოპოვებული წყლის გამათბობელი ავზი ნივთმტკიცებად ამოიღეს. ბ.ღ.-ს საცხოვრებელი სახლის ჩხრეკისას ამოღებულია 11 შეკვრა ნაქურდალი მეტლახი. პოლიციამ მ.კ.-ს მიერ დანაშაულებრივი გზით მოპოვებული და გასხვისებული სხვადასხვა ნივთები: წყლის გამათბობელი ავზი, ცენტრალური გათბობის შვიდი რადიატორი, ელექტროჩამრთველების დაფა და ხელსაბანი ნიჟარა ნივთმტკიცებად ამოიღო", - აცხადებენ შსს-ში.

საქმეზე გამოძიება სისხლის სამართლის კოდექსის 177-ე მუხლის მეორე ნაწილის "ა" და "ბ" პუნქტებითა და მესამე ნაწილის "ა" ქვეპუნქტით მიმდინარეობს. ამ მუხლებით, ქურდობის დამტკიცების შემთხვევაში, დაკავებულებს თავისუფლების აღკვეთა სამიდან შვიდ წლამდე ემუქრებათ.