სირიაში, საქართველოს მოქალაქე, ლაფანყურის სპეცოპერაციის მონაწილე, პანკისელი გიორგი მარგოშვილი (იგივე ფეიზულა კუშტანაშვილი) დაიღუპა. პანკისის სათემო რადიო WAY-ს ცნობით, ოჯახის წევრებმა მისი გარდაცვალება დაადასტურეს:

"ჩეჩნეთის შსს-ს ინფორმაციით, გიორგი მარგოშვილი (იგივე სალაჰუდინ შიშანი) სირიაში დაჯგუფება ჯეიშ-ალ-მუხაჯირინ ვალ-ანსარს სათავეში 2013 წლის ბოლოს ჩაუდგა, მას შემდეგ, რაც მისი ყოფილი მეთაური აბუ უმარ ალ-შიშანი (თარხან ბათირაშვილი) თავის მებრძოლების ნაწილთან ერთად ე.წ. ისლამურ სახელმწიფოს შეუერთდა და ჩრდილოეთის ფრონტის მეთაურად დაინიშნა. 2015 წლის სექტემბერში YouTube-ით გავრცელდა ვიდეომიმართვა, სადაც სალაჰუდინ შიშანი საკუთარ თავს და მხარდამჭერებს სირიაში "კავკასიის ემირატის" მუჯაჰედებს უწოდებდა."

რადიოს ცნობით, 2015 წლის ოქტომბერში სალაჰუდინ შიშანი და მისი მომხრეები გამოეყვნენ ჯეიშ-ალ-მუხაჯირინ ვალ-ანსარს და შეუერთდნენ ჯებჰატ ალ ნუსრას, რომელიც როგორც სირიის ხელისუფლების, ისე ე.წ. ისლამური სახელმწიფოს წინააღმდეგ იბრძვის.

პანკისის სათემო რადიოს მონაცემებით, სირიაში საბრძოლო მოქმედებებს უკვე 26 პანკისელი ემსხვერპლა.