საზოგადობრივი მაუწყებლის აღმასრულებელი საბჭო მზად არის, პირადად შეხვდეს პრეზიდენტს და დეტალურად განუმარტოს მაუწყებლის პოზიცია და არგუმენტები. პრეზიდენტის დღევანდელ შეთავაზებაზე, მაუწყებლის კანონში ცვლილებებთან დაკავშირებით, საბჭომ განცხადება გაავრცელა.

აღმასრულებელი საბჭო პრეზიდენტს განუმარტავს, რომ მათთვის მიუღებელია შერეულ ფორმატში მონაწილეობა:

"იმის გამო, რომ გარკვეული ჯგუფები ცდილობენ, განზრახ არასწორად განმარტონ კანონის კონკრეტული მუხლები და სრულად დაამახინჯონ კანონის ზოგადი სულისკვეთება, მათთან კამათი მიუღებლად მიგვაჩნია ჩვენი პრინციპებიდან და მაუწყებლის ინტერესებიდან გამომდინარე".

განცხადებაში ნათქვამია ისიც, რომ თუკი პრეზიდენტთან პირადად შეხვედრის შემდეგ კიდევ დარჩება კითხვები საკანონმდებლო ცვლილებებთან დაკავშირებით, მზად არიან შეხვედრის სხვა ფორმატზე სასაუბროდაც:

"იმის გამო, რომ საკანონმდებლო ცვლილებები უშუალოდ შეეხება საზოგადოებრივ მაუწყებელს, ჩვენ ველოდებით, რომ ბატონი პრეზიდენტი დათანხმდება შეხვედრის ჩვენ მიერ შეთავაზებულ ფორმატს და გულწრფელად შეეცდება, გაერკვეს „პირველი არხის“ წინაშე მდგარ გამოწვევებთან დაკავშირებით, რომელთა გადაჭრა საკანონმდებლო ცვლილებების გარეშე შეუძლებელია".

დღეს, საქართველოს პრეზიდენტის ადმინისტრაციამ განაცხადა, რომ გიორგი მარგველაშვილი ორშაბათს, მედიის, არასამთავრობო სექტორისა და მაუწყებლის შესახებ კანონში შესატან ცვლილებებთან დაკავშირებით დაინტერესებული მხარეების წარმომადგენლებს შეხვდება.