საგარეო საქმეთა სამინისტრომ გერმანიაში საქართველოს საგანგებო და სრულუფლებიანი ელჩის თანამდებობაზე ელგუჯა ხოკრიშვილის კანდიდატურა წარადგინა. პრემიერმა, გიორგი კვირიკაშვილმა დანიშვნასთან დაკავშირებით განკარგულებას ხელი უკვე მოაწერა.

გერმანიის ფედერაციულ რესპუბლიკაში საქართველოს საგანგებო და სრულუფლებიან ელჩის კანდიდატად წარდგენილი ელგუჯა ხოკრიშვილი 2014-2015 წლებში იყო საქართველოს მინისტრთა კაბინეტის წევრი, ეკავა რეგიონული განვითარებისა და ინფრასტრუქტურის მინისტრის, შემდეგ კი საქართველოს გარემოსა და ბუნებრივი რესურსების დაცვის მინისტრის თანამდებობა.

ამჟამად ხოკრიშვილი გერმანიაში საქართველოს დიპლომატიურ წარმომადგენლობაში საელჩოს უფროსი მრჩევლის თანამდებობა უკავია. 2002-2008 წლებში მუშაობდა პოტსდამის უნივერსიტეტში სხვადასხვა პოზიციაზე.

გერმანიაში ელჩის თანამდებობაზე ხოკრიშვილი ლადო ჭანტურიას შეცვლის, რომელიც სტრასბურგის ადამიანის უფლებათა სასამართლოში მოსამართლედ დაინიშნა.