ევროპა-ბეთის გათამაშება დასრულდა და მასში გამარჯვებულიც გამოვლინდა. ევროპის ჩემპიონატის ჯგუფური ეტაპის შედეგების გამოცნობაში საუკეთესო შედეგი ფოთელმა ანზორ მირცხულავამ აჩვენა და 200 ათასი ლარი მოიგო.

იღბლიანმა მოთამაშემ არც მეტი - არც ნაკლები, 26 თამაშის შედეგი გამოიცნო სწორად!

ჩვენ მისი ბილეთი ექსკლუზიურად მოვიპოვეთ. შეგიძლიათ იხილოთ ის შედეგი, რომელმაც მას ევროპა-ბეთზე 200 ათასი ლარი მოაგებინა.

შეიძლება ითქვას, რომ A ჯგუფის თამაშები ყველაზე ადვილი გამოსაცნობი იყო. აქ იყო გამოკვეთილი ფავორიტი საფრანგეთი, დაახლოებით ერთი დონის გუნდები რუმინეთისა და შვეიცარიის სახით და გამოკვეთილი აუთსაიდერი ალბანეთი. პირველი ორი შედეგი რომ საფრანგეთისა და შვეიცარიის გამარჯვებით დასრულდებოდა, ალბათ ცხადი იყო. რუმინეთი - შვეიცარიის ფრეც საკმაოდ ადვილად გამოსაცნობი შედეგი აღმოჩნდა. ოდნავ სარისკო ამ ჯგუფის შედეგებში საფრანგეთ-შვეიცარიის ფრე და ალბანეთის მოგება იყო რუმინეთთან. ცხადია, ისიც თამაშების დაწყებამდე, თორემ უშუალოდ ჩემპიონატზე ვნახეთ, რომ რუმინეთმა როგორც საქართველოსთან 5-1 დააქუხა, საფრანგეთში ისე ვერ აწვიმა.

ანზორ მირცხულავამ B ჯგუფის პირველივე თამაში რატომღაც ვერ გამოიცნო. ეჭვი მაქვს, მაგ დროს ძალიან ეწყინებოდა, რომ უელსში მოთამაშე რამდენიმე უმაღლესი დონის ფეხბურთელის ფაქტორი ვერ გაითვალისწინა და გული დასწყდებოდა და იფიქრებდა, აწი ვეღარ მოვიგებო. როგორც ხედავთ, რუსეთი - უელსიც ამ უკანასკნელის საწინააღმდეგოდ აქვს გადაწყვეტილი და ინგლისი - უელსიც. როგორც ჩანს, ის ძალიან არ ენდობოდა გარეტ ბეილსა და აარონ რემზის, მაგრამ არაუშავს, სამაგიეროდ დანარჩენი ოთხი თამაშის შედეგი გამოიცნო და კიდევ ერთი ნაბიჯი გადადგა 200 ათასის მოგებისკენ.

საერთოდ, თუ დააკვირდებით, ანზორ მირცხულავა ბრიტანულ ნაკრებებს საერთოდ არ სწყალობს. ინგლისი - უელსის თამაშში ალბათ ცუდსა და უარესს შორის ამოარჩია და მხოლოდ ამის ხარჯზე შეძლო შედეგის გამოცნობა. C ჯგუფში უკრაინასთან ძმობასა და ბრიტანელების მიმართ უნდობლობას რომ არ აჰყოლოდა, 26 თამაშის ნაცვლად 27-ს გამოიცნობდა, მაგრამ არაუშავს, მთავარია, რომ 200 ათასი მაინც მოიგო და ევროპა-ბეთის გათამაშების საუკეთესო შედეგი აჩვენა. ერთი თამაში გინდ - იქით და გინდ - აქეთ.

D ჯგუფში ესპანეთს ზედმეტად ენდო. თანაც, ალბათ, ცხადი იყო, რომ ორი მოგებული თამაშის მერე ესპანეთი ხორვატიასთან ისე ითამაშებდა, როგორც საქართველოსთან და ძირითადი შემადგენლობა მერვედფინალისთვის ძალების დასაზოგად მაინცდამაინც თავს არ მოიკლავდა. მეორე წრეში აშკარად გარისკა, როცა ჩეხეთი ხორვატიის ფრე დაწერა. ალბათ, პაველ ნედვედის ხათრით, რომელიც კარგა ხანია აღარ თამაშობს, მაგრამ ჩეხეთის ნაკრები ჯერ კიდევ მასთან ასოცირდება, როგორც დინამო და თასების თასი. რისკმა გაამართლა, მაგრამ მხოლოდ ერთხელ. ნედვედის ექომ ვეღარ შეაჩერა თურქეთი, მაგრამ არაუშავს, ბოლო ორმა თამაშმა ვერც ვერაფერი დააკლო 200 ათასს, მთავარი ეგ არის.

F ჯგუფში ძალიან უყოჩაღია მირცხულავას - საერთოდ არ ენდო ზლატანს. არადა, ბევრს ექნებოდა მისი სიდიადის იმედი და ალბათ, ძალიან ბევრი ბილეთი გაფუჭდა მის გამო, მაგრამ აწ უკვე გამარჯვებული არ მოტყუვდა და 200 ათასისთვის ბრძოლაში ზლატანიც კი ჩამოიტოვა ევროპა-ბეთის გათამაშებაში. ყოჩაღ!

მოგებულ ბილეთში ყველაზე მეტი შეცდომა F ჯგუფშია დაშვებული. ღმერთმანი, მართლაც ერთ-ერთი ყველაზე არაპროგნოზირებადი ჯგუფი იყო. ერთი მხრივ, რონალდუს დომინაცია უნდა ყოფილიყო, ისლანდია უშანსო აუთსაიდერი, ავსტრიას მეორე ადგილისთვის ებრძოლა და უნგრეთს - მესამესთვის, მაგრამ რონალდუმ ვერაფერი გააკეთა, ასეთ სუსტ გუნდებთანაც კი და ისლანდიამ ისეთები ჩაატარა, ბიორკიც კი გაოგნებული დატოვა. ისლანდიელების ფრე პორტუგალიასთან და მოგება ავსტრიასთან სასწაულის ტოლფასი იყო, მაგრამ არა ისეთი, რომ ანზორ მირცხულავასთვის 200 ათასი წაერთვა. თანაც, რატომ უნდა წაერთვა? ასეთი შედეგით ისლანდია ევროპის ჩემპიონატის მეოთხედფინალშია და ანზორ მირცხულავა - ევროპა-ბეთის გამარჯვებული.

ანზორ მირცხულავას ერთი შეხედვით საკმაოდ ადვილი გამოსაცნობი თამაშები აქვს “დასმული”, რომ შეხედავ, იტყვი, ეჰ, ამას ვფიქრობდი მეცო, მაგრამ ფიქრს ალღოც უნდა, ალბათ და ცოტა რისკიც. ჰოდა, ასეთი ალღოსა და რისკის ხარჯზე მოიგო ადამიანმა 200 ათასი, რასაც მთელი გულით ვულოცავთ.