თბილისის საქალაქო სასამართლოს 7 დეკემბრის გადაწყვეტილებით, შინაგან საქმეთა სამინისტროს მოქალაქე ჟ.გ.-ს მორალური ზიანის ანაზღაურებისთვის 5 000 ლარის გადახდა დაეკისრა.

2011 წლის 26 მაისის საპროტესტო აქციის დარბევისას დაზარალებულის ინტერესებს სასამართლოში ადამიანის უფლებათა ცენტრი იცავდა.

მთავარი პროკურატურის დადგენილებით, 2011 წლის 26 მაისს შსს-ს სპეცრაზმმა თბილისში, საპროტესტო მიტინგის დაშლისას, ფიზიკური ძალისა და სპეციალური საშუალებების არაპროპორციული გამოყენების შედეგად მიყენებული ზიანის გამო, ჟ.გ. დაზარალებულად სცნეს.

სასამართლოში წარდგენილი ადმინისტრაციული სარჩელის მიხედვით, მოქალაქე შსს-სგან მორალური ზიანის ანაზღაურებას 30 000 ლარის ოდენობით მოითხოვდა. სასამართლომ მოთხოვნა ნაწილობრივ დააკმაყოფილა და შსს-ს მხოლოდ 5000 ლარის გადახდა დააკისრა.

სასამართლო პროცესის მიმდინარეობისას მოსარჩელე აცხადებდა რომ, საპროტესტო აქციის დარბევისას მიყენებული დაზიანებებით მისი ჯანმრთელობის მდგომარეობა მნიშვნელოვნად გაუარესდა, რის გამოც მას ესაჭიროება სხვადასხვა სახის გამოკვლევები და შესაბამისი მკურნალობა.

ადამიანის უფლებათა ცენტრს მიაჩნია, რომ საქმეზე თანდართული ცნობები ჟ.გ.-ს ჯანმრთელობის მდგომარეობის შესახებ, მათ შორის - წამების მსხვერპლთა ფსიქოსოციალური და სამედიცინო რეაბილიტაციის ცენტრის ცნობა საკმარის საფუძველს იძლეოდა სარჩელის სრულად დაკმაყოფილებაზე.

ადამიანის უფლებათა ცენტრის ცნობით, დაზარალებული თბილისის საქალაქო სასამართლოს გადაწყვეტილებას სააპელაციო სასამართლოში გაასაჩივრებს.