რესპუბლიკელების წევრი, ლევან ბერძენიშვილი მიიჩნევს, იმ შემთხვევაში, თუ პრემიერმინისტრი, გიორგი კვირიკაშვილი თავდაცვის მინისტრის მიერ მიღებულ გადაწყვეტილებას გააუქმებს, ეს იქნება საქართველოს თავდაცვისუნარიანობის, ნატოსა და ევროპის წინააღმდეგ მიმართული ნაბიჯი:

"საარჩევნო ბრძოლაში რესპუბლიკელების მიმართ, რომელიც მიიჩნევა, რომ ურეიტინგო ძალაა და სხვა, მეტისმეტად დიდი ძალებია გამოყენებული და ბევრი მონაწილეობს ამ საქმეში, ცოტა უხერხულიც კი არის თუ რეიტინგი არ არის და არაფერს წარმოადგენს, ამოდენა დარაზმულობა რა საჭიროა. მაგრამ, რა თქმა უნდა, ეს არის პირადად თინა ხიდაშელის წინააღმდეგაც მიმართული და არაცნობიერად, ზოგიერთ შემთხვევაში, ძალიანაც ცნობიერად, მეჭიაურის დასკვნების შემთხვევაში, ეს არის საქართველოს, ნატოს და ევროპის წინააღმდეგ მიმართული ნაბიჯები".

გუშინ თინა ხიდაშელმა მედიასთან გამართულ შეხვედრაზე ხელი იმ გადაწყვეტილებას მოაწერა, რომლის თანახმადაც, თავდაცვის სამინისტრო სავალდებულო სამხედრო სამსახურში მოქალაქეებს აღარ გაიწვევს.

თუმცა, როგორც On.ge-ს თავდაცვის სამინისტროში განუმარტეს, აღნიშნული ცვლილება სამხედრო მოსამსახურეთა მხოლოდ იმ 25%-ს შეეხება, რომლებსაც სწორედ ეს უწყება იწვევდა ჯარში, დანარჩენ 75%-ს კი, რომელსაც შსს და სასჯელაღსრულების დეპარტამენტი იწვევს, ცვლილებები არ შეეხება.