საქართველოს ყოფილი პრეზიდენტსა და ოდესის ყოფილ გუბერნატორზე, მიხეილ სააკაშვილზე უკრაინის გენერალურმა პროკურატურამ ძებნა გამოაცხადა.

ამის შესახებ უკრაინული გამოცემა РБК-Украина იუწყება, გენერალური პროკურორის პრეს-სპიკერზე, ანდრეი ლისენკოზე დაყრდნობით.

ამავე გამოცემის ცნობით, ლისენკომ ჟურნალისტებთან საუბრისას აღნიშნა, რომ გენერალურმა პროკურატურამ უკვე მოამზადა და გადასცა უკრაინის ნაციონალური პოლიციის ხელმძღვანელს დადგენილება სააკაშვილზე ძებნის გამოცხადების შესახებ.

გენერალურმა პროკურორმა იური ლუცენკომ კი უკრაინის რადაში სიტყვით გამოსვლისას მიხეილ სააკაშვილს უსაფრთხოების სამსახურში ნებაყოფლობით გამოცხადებისთვის 24-საათიანი ვადა მისცა.

დაკავებული მიხეილ სააკაშვილი თავისმა მხარდამჭერებმა სპეცრაზმის ბლოკირებული მანქანიდან გადმოიყვანეს.

დღეს, 5 დეკემბერს, კიევში საკუთარ ბინაში მიხეილ სააკაშვილი დააკავეს. დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

იუკრაინის გენპროკურორის, იური ლუცენკოს თქმით, სააკაშვილს ბრალი ედება მძიმე დანაშაულში უკრაინის სახელმწიფოს წინააღმდეგ. ლუცენკოს განმარტებით, სააკაშვილის საპროტესტო აქციების მიზანი ხელისუფლების დამხობა იყო და მისი გუნდი ფინანსებოდა იანუკოვიჩის წარმომადგენლების მიერ. უკრაინელი სამართალდამცავების ცნობით, ექს-გუბერნატორდს ნახევარი მილიონი აშშ დოლარი გადასცა რუსულმა მხარემ.