ტყუპი ძმები ტაილერ და კამერონ ვინკლვოსები, წლების წინ, Facebook-ის დამაარსებელს, მარკ ცუკერბერგს, სასამართლოში ედავებოდნენ. ძმები ამბობდნენ, რომ ცუკერბერგმა Facebook-ის იდეა მათგან მოიპარა. სასამართლოს გადაწყვეტილებით მარკ ცუკერბერგს ძმების სასარგებლოდ $65 მილიონი დოლარის გადახდა დაევალა.

სწორედ ცუკერბერგისგან მიღებული თანხის ნაწილი, დაახლოებით, $11 მილიონი დოლარი, ტყუპებმა კრიპტოვალუტაში, კერძოდ კი, ბიტკოინში დააბანდეს. ძმებმა ინვესტიცია 2013 წელს განახორციელეს, იმ დროისთვის ერთი ბიტკოინი $120 ღირდა შესაბამისად, $11 მილიონი დოლარის ინვესტირებით ტყუპებმა დაახლოებით 100 ათასი ბიტკოინი შეიძინეს. დროთა განმავლობაში, ბიტკოინის ფასმა ბაზარზე საგრძნობლად მოიმატა და წინა კვირაში რეკორდულ $10-ათასიან ნიშნულს გადააჭარბა. ამგვარად, ძმების ინვესტიციამ უზარმაზარი ამონაგები ნახა და მათ ხელში არსებული ბიტკოინების ღირებულებამ $1 მილიარდ დოლარს გადააჭარბა.

ძმებ ვინკლვოსების პერსონაჟები დევიდ ფინჩერის "სოციალურ ქსელშიც" გამოჩდნენ, რომელიც 2010 წელს გამოვიდა და Facebook-ის დაარსების ისტორიას მოგვითხრობდა. ფილმში ძმების როლი ერთმა მსახიობმა, არმი ჰამერმა შეასრულა.

ვინკლვოსები ჰარვარდის კურსდამთავრებულები არიან, მათ ასევე მონაწილეობა მიიღეს 2008 წლის პეკინის ოლიმპიურ თამაშებში. ისინი წლების განმავლობაში დაკავებულები იყვნენ აკადემიური ნიჩბოსნობით.