პარლამენტის თავმჯდომარე, ირაკლი კობახიძე და მისი პირველი მოადგილე, თამარ ჩუგოშვილი სახალხო დამცველის პოსტზე არასამთავრობო ორგანიზაციების მიერ შეთავაზებული ოთხი კანდიდატიდან ერთ-ერთის არჩევა ემხრობიან. ამის შესახებ მათ ჟურნალისტებთან ისაუბრეს.

კობახიძის თქმით, კანდიდატი უნდა იყოს მიუკერძოებელი, კვალიფიციური და უნდა ჰქონდეს გამოცდილება ადამიანის უფლებების სფეროში. მისივე თქმით, უმრავლესობაში იმსჯელებენ კანდიდატებთან დაკავშირებით:

"ჩვენთვის, რა თქმა უნდა, მნიშნველოვანია, რომ იყოს თანხვედრა საპარლამენტო უმრავლესობისა და სამოქალაქო სექტორის პოზიციებში."

თამარ ჩუგოშვილი აცხადებს, რომ არასამთავრობო ორგანიზაციების მიერ დასახელებული ადამიანები საკმაოდ ღირსეული კანდიდატები არიან და დამტკიცებული აქვთ ერთგულება ადამიანის უფლებების მიმართ. თუმცა, მისი თქმით, გამორიცხული არაფერი არაა და უმრავლესობაში დისკუსია, შესაძლოა, სხვა მიმართულებით წავიდეს.