დღეს, 23 ნოემბერს საქართველოს მართლმადიდებელი ეკლესიის პატრიარქმა ილია მეორემ საპატრიარქო ტახტის მოსაყდრედ, ანუ საჭიროების შემთხვევაში პატრიარქის მოვალეობის შემსრულებლად მიტროპოლიტი შიო მუჯირი დანიშნა.

მუჯირის შესახებ ბევრი ინფორმაცია არ იძებნება და არც მისი პოზიციებია ცნობილი სხვადასხვა საკითხთან დაკავშირებით, თუმცა ტაბულას ინფორმაციით, იგი პრეზიდენტ მარგველაშვილის ბავშვობის მეგობარია და ახლო კავშირი აქვს ბიზნესმენ ლევან ვასაძესთან.

მარგველაშვილი საარჩევნო კამპანიის დროს, ვასაძესთან ერთად შიო მუჯირის ეპარქიაშიც იმყოფებოდა და ერთ-ერთი სკოლაც მოინახულა.

"სკოლა 2010 წელს სენაკისა და ჩხოროწყუს მიტროპოლიტ შიოს ლოცვა-კურთხევით, ბიზნესმენ ლევან ვასაძის თანადგომით, ადგილობრივი ხელისუფლების ხელშეწყობით და შემოწირულობით დაარსდა," - წერია განათლების სამინისტროს 2013 წლის რელიზში.

  • 1988 წელს ერისკაცობაში ელიზბარ მუჯირმა თბილისის სახელმწიფო კონსერვატორიაში ვიოლონჩელოს კლასში დაიწყო სწავლა;
  • 1993 წელს ბერად აღიკვეცა და შიო ეწოდა;
  • 1995 წელს ბერი შიო დიაკვნად აკურთხეს;
  • 1996 წელს ილია მეორემ ბერ-დიაკონი შიო მღვდლად აკურთხა;
  • 1998 წელს მან დაამთავრა ბათუმის იოანე ღვთისმეტყველის სახელობის სასულიერო სემინარია და სწავლა მოსკოვის სასულიერო აკადემიის დაუსწრებელ განყოფილებაზე გააგრძელა;
  • 2001 წლის ოქტომბრიდან იგი მოსკოვის ქართველთა სათვისტომოს წმიდა გიორგის სახელობის ტაძრის წინამძღვარია, პარალელურად სწავლობდა მოსკოვის წმიდა ტიხონის საღვთისმეტყველო ინსტიტუტში;
  • 2010 წელს მიტროპოლიტის წოდება მიანიჭეს.

საპატრიარქო ტახტის მოსაყდრე ეკლესიას მართავს იმ დროს, როცა პატრიარქი ვერ ასრულებს თავის მოვალეობებს, მისი გარდაცვალების ან გადადგომის შემთხვევაში, ახალი პატრიარქის არჩევამდე. მოსაყდრის დანიშვნიდან 40 დღის შემდეგ, არა უგვიანეს ორი თვისა, იგი ეკლესიის გაფართოებულ კრებას იწვევს, რომელზეც ახალ პატრიარქს აირჩევენ.