საქართველოს შინაგან საქმეთა ახალმა მინისტრმა, გიორგი გახარიამ, გუშინ, 22 ნოემბერს, თბილისში ჩატარებულ სპეცოპერაციაზე თქვა, რომ საერთაშორისო ტერორიზმთან კავშირში იყო.

"იყო ნათქვამი და ნათქვამია, რომ მიმდინარეობს სხვა ქვეყნებშიც [გამოძიება]. ყველას კარგად გვესმის, რომ საქმე გვაქვს საერთაშორისო ტერორიზმის ფაქტთან და მიმდინარეობს გამოძიება", - განაცხადა გახარიამ.

მისი თქმით, სპეცოპერაციის ჩატარების შემდეგ უკვე შესაძლებელია საქმის მშვიდად გამოძიება.

თბილისში, ისანში, გაბრიელ სალოსის ქუჩაზე, სპეცოპერაცია 20 საათზე მეტ ხანს ტარდებოდა, რა დროსაც დაზიანდა რამდენიმე საცხოვრებელი სახლი.

სახელმწიფო უსაფრთხოების სამსახურის ინფორმაციით, თბილისში, ისანში, გაბრიელ სალოსის ქუჩაზე, სპეცოპერაციის დროს დაკავებულია ერთი პირი და ლიკვიდირებულია სამი. უწყებაში აღნიშნავენ, რომ სპეცოპერაციის დროს გარდაიცვალა ერთი სპეცრაზმელი და დაიჭრა - ორი. გარდა ამისა, დაჭრილია შინაგან საქმეთა სამინისტროს ორი თანამშრომელი.