თემქაზე მომხდარი ავტოსაგზაო შემთხვევის შედეგად, ორი არასრულწლოვანი გოგო დაიღუპა. შემთხვევა დღეს, 21 ნოემბერს დილის 10 საათზე მოხდა.

საზოგადოებრივი მაუწყებლის ცნობით, ორი მსუბუქი ავტომობილის შეჯახების შედეგად სამი პირი დაშავდა, თუმცა 7 წლის გოგო საავადმყოფოში მიყვანამდე გარდაიცვალა, 16 წლის გოგოს გადარჩენა კი ექიმებმა ვერ შეძლეს. მესამე დაშავებული კაცი საავადმყოფოდან უკვე გაწერეს.

შინაგან საქმეთა სამინისტროში On.ge-ს განუცხადეს, რომ მომხდარზე გამოძიება სისხლის სამართლის კოდექსის 276-ე მუხლის, მე-7 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევა გულისხმობს, რამაც ორი ან მეტი ადამიანის გარდაცვალება გამოიწვია.