BBC-ის ინფორმაციით, ამერიკის შეერთებული შტატები და ევროკავშირი რუსეთს 34 წლის უკრაინელი პილოტის, ნადეჟდა სავჩენკოს გათავისუფლებისკენ მოუწოდებს. ევროკავშირმა შეშფოთება გამოთქვა სავჩენკოს ჯანმრთელობის მდგომარეობასთან დაკავშირებით, 5 963 ადამიანმა კი უკვე მოაწერა ხელი უკრაინელი პილოტის გათავისუფლების მოთხოვნით შექმნილ პეტიციას, რომლის ადრესატებიც ევროპის ლიდერები არიან.

დღეს, 9 მარტს გამართულ სასამართლო პროცესზე უკრაინელმა მფრინავმა მის მიმართ წაყენებული ბრალდება კიდევ ერთხელ უარყო და განაცხადა, რომ შიმშილობას კვლავ აგრძელებს. სავჩენკომ რუსი მოსამართლეები მასხრად აიგდო, შუა თითი უჩვენა და ფაშისტები უწოდა მათ.

სავჩენკოს გათავისუფლების მოთხოვნით პეტიცია რამდენიმე დღის წინ შეიქმნა. მიზანი 50 ათასი ხელმოწერის მოგროვებაა, ამ ეტაპზე კი ხელი 5 963 ადამიანს აქვს მოწერილი. ბრალდების მხარე სავჩენკოსათვის 23-წლიან პატიმრობას ითხოვს, მოსამართლე კი ვერდიქტის გამოტანას 21 მარტს აპირებს. როგორც სავჩენკოს ადვოკატმა განაცხადა, თუ მისი დაცვის ქვეშ მყოფს ჭამას არ დააძალებენ, ვერდიქტის გამოცხადებამდე სავჩენკო ცოცხალი აღარ იქნება.

უკრაინელმა პილოტმა მშრალი შიმშილობა 4 მარტს, მას შემდეგ დაიწყო, რაც სასამართლომ მისი დასკვნითი სიტყვა გადაავადა.

რუსულმა მხარემ ნადეჟდა სავჩენკო 2014 წელს წელს დააკავა და ბრალად რუსი ჟურნალისტების იგორ კორნელიუკისა და ანტონ ვოლოსინის მკვლელობა დასდო. ამ დროის განმავლობაში სავჩენკო ბრალდებას უარყოფს და ამტკიცებს, რომ მის ირგვლივ განვითარებული პროცესებს პოლიტიკური სარჩული აქვს. მისი განმარტებით, 2014 წლის ივნისში აღმოსავლეთ უკრაინაში მას შემდეგ შეიპყრეს, რაც რუსი ჟურნალისტები უკვე დახოცილები იყვნენ.

ვითარება რუსეთსა და უკრაინას შორის 2014 წელს მოსკოვის მიერ ყირიმის ანექსიის შემდეგ განსაკუთრებით დაიძაბა.