Mozilla-მ ცნობილი ბრაუზერის, Firefox-ის, განახლებული ვერსია გამოუშვა. როგორც კომპანიის ოფიციალურ საიტზე ვკითხულობთ, Firefox Quantum ახალ ძრავაზეა აგებული და მუშაობისას 30%-ით ნაკლებ რესურსს იყენებს. შეიცვალა დიზაინიც.

მოზილას მტკიცებით, Firefox Quantum გუგლის Chrome-ზე ორჯერ სწრაფად მუშაობს და მნიშვნელობა არ აქვს რამდენი ტაბი გაქვთ გახსნილი 10 თუ ათასი. ტაბებს შორის ნავიგაციაც სწრაფი და კომფორტულია.

გარდა ამისა, მოზილას განცხადებით, ანონიმური ბრაუზინგი გაუმჯობესებულია და ანონიმურობა სრულადაა დაცული. Firefox Quantum ყველა სკრიპტსა და რეკლამას ბლოკავს, რომელიც საიტებზე ანონიმურად შესვლისას თქვენი ინფორმაციის მოპოვებას ცდილობენ.

"ეს ყველაზე დიდი განახლებაა 2004 წლის შემდეგ, როცა ჩვენ პირველი Firefox გავუშვით", ვკითხულობთ კომპანიის ბლოგზე.

დამახსოვრებული მონაცემებისა და პაროლების სხვა ბრაუზერიდან გადმოტანა უადვილესი პროცესია. დაინსტალირების შემდეგ გახსენით Firefox Quantum, შემდეგ დააჭირეთ ამ ღილაკებს: Ctrl/Cmd+Shift+B და აირჩიეთ: Import and Backup > Import Data from Another Browser. შემდეგ მოგიწევთ იმ ბრაუზერის არჩევა, რომლიდანაც გინდათ მონაცემების გადმოტანა, აირჩიეთ რა სახის ინფორმაციის იმპორტი გინდათ და დაელოდეთ რამდენიმე წამი. მორჩა.