საქართველოს ფინანსთა სამინისტროს საგამოძიებო სამსახურში აცხადებენ, რომ კანონის დარღვევით მოქმედი ექვსი ერთეული სათამაშო აპარატი ამოიღეს. მათივე ინფორმაციით, სულ უკანონო სამეწარმეო საქმიანობის ხუთი ფაქტი გამოავლინეს.

როგორც On.ge-ს უწყებაში განუცხადეს ამ ეტაპზე არავინ არის დაკავებული.

"გამოძიებით დადგინდა, რომ თბილისის სხვადასხვა უბანში, განსაკუთრებით ხალხმრავალ ადგილებში - მეტროპოლიტენის სადგურებისა და ბაზრობის მიმდებარე ტერიტორიაზე, დიდი ოდენობით შემოსავლის უკანონოდ მიღების მიზნით, პირთა ჯგუფს ლიცენზიებისა და ნებართვების შესახებ საქართველოს კანონით გათვალისწინებული შესაბამისი ნებართვის გარეშე, აზარტული თამაშებისთვის განკუთვნილი აპარატები ჰქონდათ განთავსებული", - აცხადებენ საგამოძიებო უწყებაში.

საქმეზე გამოძიება საქართველოს სისხლის სამართლის კოდექსის 192-ე მუხლის მეორე ნაწილით მიმდინარეობს. ამ მუხლით, უკანონო სამეწარმეო საქმიანობა ისჯება სამიდან ხუთ წლამდე თავისუფლების აღკვეთით.