სერბი კინორეჟისორი და მუსიკოსი ემირ კუსტურიცა ე.წ. აფხაზეთის კეთილი ნების ელჩებს შეუერთდა. ამასთან დაკავშირებით მუსიკოსს მოსკოვში სერტიფიკატი და მედალი გაუგზავნეს. ინფორმაციას რუსეთის ხელისუფლების მიერ დაფინანსებული Sputnik-abkhazia ავრცელებს.

გამოცემის თქმით, კუსტურიცამ მხარი დაუჭირა კეთილი ნების ელჩების საქველმოქმედო ინიციატივას. კერძოდ, აფხაზეთში კულტურული ძეგლების დაცვის მიზნით მსოფლიო საზოგადოების ყურადღების მიქცევა.

"მე, როგორც გაეროს კეთილი ნების ელჩი, მხარს ვუჭერ აფხაზეთის კეთილი ნების ელჩებს. აფხაზეთში არსებული უძველესი ქრისტიანული ტაძრები უნდა შენარჩუნდეს და მომავალმა თაობამ ისინი უნდა იხილოს", - თქვა კუსტურიცამ.

რამდენიმე კვირის წინ, აფხაზეთის დე-ფაქტო ხელისუფლების კეთილი ნების ელჩებმა იუნესკოსა და გაეროს კეთილი ნების ელჩებს ვიდეომიმართვა გაუგზავნეს, სადაც ითხოვენ, რომ ორგანიზაციებმა აფხაზეთის ტერიტორიაზე არსებული ქრისტიანული ტაძრების შენარჩუნებაში დახმარებას ითხოვენ.

კუსტურიცას გაუქმებული კონცერტი თბილისში

სექტემბერში ცნობილი გახდა, რომ სერბი კინორეჟისორი და მუსიკოსი ემირ კუსტურიცა, რომელიც ოკუპირებულ ცხინვალსა და ანექსირებულ ყირიმში არის ნამყოფი, რვა დეკემბერს თბილისში კონცერტს გამართავდა. 2009 წელს კუსტურიცა ოკუპირებულ ცხინვალში ფილმის გადასაღებად იყო ჩასული.

საქართველოში მოქმედი ოკუპირებული ტერიტორიების შესახებ კანონის მიხედვით უცხო ქვეყნის მოქალაქეებისთვისა და მოქალაქეობის არმქონე პირებისათვის ოკუპირებულ ტერიტორიებზე შესვლა დაშვებულია მხოლოდ ორ შემთხვევაში:

  • აფხაზეთის ავტონომიური რესპუბლიკის ტერიტორიებზე - ზუგდიდის მუნიციპალიტეტის მიმართულებიდან;
  • ცხინვალის რეგიონში - გორის მუნიციპალიტეტის მიმართულებიდან.

სხვა ნებისმიერ შემთხვევაში ოკუპირებულ ტერიტორიებზე აკრძალულია და ისჯება საქართველოს სისხლის სამართლის კოდექსით. ოკუპირებული ტერიტორიების შესახებ კანონის დარღვევას ხანდაზმულობის ექვსწლიანი ვადა აქვს. ემირ კუსტურიცა კი ცხინვალში რვა წლის წინ იყო.

კონცერტის დაანონსებიდან რამდენიმე დღეში ორგანიზატორებმა კონცერტი გადადეს. მათთვის არ იყო ცნობილი, რომ კუსტურიცას საქართველოში ჩამოყვანა კანონმდებლობასთან წინააღმდეგობაში მოდიოდა:

"ის კარგად იცნობს საქართველოს ისტორიასა და კულტურას და ძალიან აინტერესებს საქართველოში ჩამოსვლა. ემირ კუსტურიცა ჩამოვა მხოლოდ იმ შემთხვევაში, თუ იქნება ხელისუფლების მხრიდან მზაობა მისი სტუმრობისთვის".