თბილისში დაგეგმილი ემირ კუსტურიცას კონცერტი გადაიდო. ორგანიზატორების თქმით, მათთვის არ იყო ცნობილი, რომ კუსტურიცას საქართველოში ჩამოყვანა კანონმდებლობასთან წინააღმდეგობაში მოდიოდა.

ემირ კუსტურიცა 2009 წელს ოკუპირებული ცხინვალის ტერიტორიაზე ფილმის გადასაღებად იყო ჩასული.

არტ მედია ჯგუფის ხელმძღვანელის ლელა ასლანიკაშვილის თქმით, საქართველოში მოქმედი კანონმდებლობიდან გამომდინარე, ემირ კუსტურიცას ვიზიტთან დაკავშირებით, გარკვეული იურიდიული საკითხების დაზუსტება გახდა საჭირო.

მისივე თქმით, კომპანიამ მიიღო გადაწყვეტილება, რომ დაეწყო კონსულტაციები და მანამდე შეეჩერებინა კონცერტის ბილეთების გაყიდვები:

"ის კარგად იცნობს საქართველოს ისტორიასა და კულტურას და ძალიან აინტერესებს საქართველოში ჩამოსვლა. ემირ კუსტურიცა ჩამოვა მხოლოდ იმ შემთხვევაში, თუ იქნება ხელისუფლების მხრიდან მზაობა მისი სტუმრობისთვის".

შინაგაგან საქმეთა სამინისტრომ On.ge-ს უთხრა, რომ სერბი რეჟისორისა და მუსიკოსის, ემირ კუსტურიცას საქართველოში ჩამოსვლის დროს კანონის შესაბამისად იმოქმედებენ.

საქართველოში მოქმედი ოკუპირებული ტერიტორიების შესახებ კანონის მიხედვით უცხო ქვეყნის მოქალაქეებისთვისა და მოქალაქეობის არმქონე პირებისათვის ოკუპირებულ ტერიტორიებზე შესვლა დაშვებულია მხოლოდ ორ შემთხვევაში:

  • აფხაზეთის ავტონომიური რესპუბლიკის ტერიტორიებზე - ზუგდიდის მუნიციპალიტეტის მიმართულებიდან;
  • ცხინვალის რეგიონში - გორის მუნიციპალიტეტის მიმართულებიდან.

სხვა ნებისმიერ შემთხვევაში ოკუპირებულ ტერიტორიებზე აკრძალულია და ისჯება საქართველოს სისხლის სამართლის კოდექსით. ოკუპირებული ტერიტორიების შესახებ კანონის დარღვევას ხანდაზმულობის ექვსწლიანი ვადა აქვს. ემირ კუსტურიცა კი ცხინვალში რვა წლის წინ იყო.

ემირ კუსტურიცა რუსეთის პრეზიდენტის, ვლადიმერ პუტინის მიმართ კეთილგანწყობით გამოირჩევა. ერთ-ერთ ინტერვიუში მან განაცხადა, რომ ხელისუფლებაში პუტინის ხელისუფლებაში მოსვლის შემდეგ სერბების მიმართ პატივისცემა გაიზარდა. 2016 წელს რუსეთის პრეზიდენტმა კუსტურიცას მეგობრობის ორდენი გადასცა.