The Guardian-ის ინფორმაციით, Netflix-მა განაცხადა, რომ სერალი House of Cards წყვეტს სექსუალურ შევიწროებაში დადანაშაულებულ კევინ სპეისისთან მუშაობას და მსახიობის ფილმში გადაღებაზე უარს აცხადებს.

"სერიალ House of Cards-ის გადაღებებში კევინ სპეისი აღარ მიიღებს მონაწილეობას. ჩვენ, ასევე, გადავწყვიტეთ, რომ აღარ გავაგრძელებთ მუშაობას ფილმ Gore-ზე, რომელშიც სპეისი, როგორც მსახიობი და პროდიუსერი ისე მონაწილეობდა", - ნათქვამია განცხადებაში.

რამდენიმე დღის წინ Netflix-მა House of Cards-ის ბოლო, მეექვსე სეზონი დააანონსა. კომპანიის თქმით, მათ ამის შესახებ გადაწყვეტილება რამდენიმე თვის წინ მიიღეს და მსახიობის მიმართ გამოთქმულ ბრალდებებს არ უკავშირდება.

გუშინ გავრცელდა ინფორმაცია, რომ, სავარაუდოდ, ბრიტანეთის პოლიცია ჰოლივუდის მსახიობის კევინ სპეისის წინააღმდეგ სექსუალური ძალადობის შესახებ გამოთქმულ ბრალდებებს გამოიძიებს. გამოძიებას Scotland Yard-ის ბავშვზე ძალადობისა და სექსუალური დანაშაულის ჯგუფი ატარებს. ამასთან, Scotland Yard-ის წარმომადგენელმა ბრალდებულის იდენტობა არ დაადასტურა, თუმცა, სავარაუდოდ, საუბარი სწორედ კევინ სპეისიზეა.

ჰოლივუდელი მსახიობი, კევინ სპეისი არასათანადო სექსუალურ ქცევაში რამდენიმე ყოფილმა და მოქმედმა თანამშრომელმა დაადანაშაულა. მის გარშემო სკანდალი დღითიდღე იზრდება.

ბრალმდებლები ყვებიან, რომ სპეისი გამოირჩეოდა შეუთანხმებელი შეხებით, შეუსაბამო სექსუალური კომენტარებით და ძირითადად ახალგაზრდა კაცებს უმიზნებდა.

კევინ სპეისის სექსუალურ შევიწროებაში პირველად ენტონი რაპმა BuzzFeed-თან ინტერვიუში დასდო ბრალი. მას შემდეგ, ოსკაროსანი მსახიობი კიდევ უფრო მეტმა კაცმა დაადანაშაულა მათ მიმართ არასათანადო ქცევაში. ბრალდებების უმრავლესობა 2004-2015 წლების პერიოდს ეხება, როდესაც კევინ სპეისი ლონდონის Old Vic თეატრის სამხატვრო ხელმძღვანელის თანამდებობას იკავებდა.

გაიგეთ მეტი კევინ სპეისის მიმართ სექსუალური შევიწროების ბრალდებების შესახებ.