თბილისის საქალაქო სასამართლომ ცხოველების უფლებადამცველს და ბიზნესმენ თამაზ ელიზბარაშვილს აღკვეთი ღონისძიების სახით პატიმრობა შეუფარდა.

სასამართლო პროცესზე დაცვის მხარემ 20 000-ლარიანი გირაოთი გაეთავისუფლება მოითხოვა, მაგრამ მოსამართლემ პროკურატურის შუამდგომლობა დააკმაყოფილა.

სასამართლო პროცესზე ელიზბარაშვილმა 30 აგვისტოს ღამის ინციდენტის დეტალები გაიხსენა. ბრალდებულის თქმით, შაკო კუჭაშვილმა და მისმა თანმხლებმა პირებმა სიტყვიერი შეურაცხყოფა მიაყენეს. ისინი მას სოციალურ ქსელში გაკეთებული განცხადებების გამო ბოდიშის მოხდას სთხოვდნენ. ელიზბარაშვილი აცხადებს, რომ ის რესტორანში მცირეწლოვან შვილთან ერთად იმყოფებოდა და უსაფრთხოების მიზნით ბავშვი კონფლიქტის ადგილს განარიდა.

"შენ ხშირად გვაგინებო და ბოდიში მოიხადე, თორემ აქედან ვერ გახვალო. ამასობაში, მე ზევით ცოლი მელოდება, ვნერვიულობ. რომ არ გამიშვეს, დავინახე, რომ ჩემი მეუღლე ჩამოვიდა ზევიდან. არ მინდოდა, რომ ჩემს მეუღლეს დაენახა, როგორ მაგინებდნენ, მაფურთხებდნენ, ერთ-ერთი, განსაკუთრებით აგრესიული იყო. არ მინდოდა ეს საუბარი მოესმინა ჩემს მეუღლეს და თან მინდოდა, რომ ჩემი მეუღლე ასულიყო ზევით და იქ ეთქვა თანამშრომლებისთვის, რომ გამოეძახათ პოლიცია ან დაცვის სამსახური. ავიდა ჩემი მეუღლე და რამდენიმე წუთში ჩამოვიდა უკვე დაცვის თანამშრომლებთან ერთად... ერთ-ერთმა, ამ შვიდი კაციდან, ხელი მომიქნია, რაღაცაც ისროლა ჩემი მისამართით," — თქვა თამაზ ელიზბარაშვილმა ["რადიო თავისუფლება"].

მოსამართლის კითხვაზე, რატომ დაბრუნდა უკან რესტორანში, ელიზბარაშვილმა უპასუხა, რომ კონფლიქტის მოგვარება სურდა.

ბრალდებული ჰყვება, რომ მას გულის პრობლემები აქვს და პროკურატურის მიერ გავრცელებულ ვიდეოშიც "გულზე უკიდია ხელი".

"ჩემს ფეისბუქგვერდზე დავწერე, რომ TV იმედის თანამშრომლებს ჩემთვის ბოდიში უნდა მოეხადათ. ამ პოსტის შემდეგ ისევ ჩავედი რესტორანში, შევხვდი ადმინისტრატორს და ავუხსენი, რომ ამ ბიჭებთან შეხვედრა მინდოდა, რათა ეს კონფლიქტი ამოგვეწურა... შვილებს გეფიცებით, თუ რამე დავამატო ან მოვიტყუო.

თუ ჩემი იქ მისვლით იმ 7 კაცს ჩემი დანახვის შეეშინდა — იმის გამო, რომ ისინი შევაშინე, საჯაროდ მოვუხდი ბოდიშს," — თქვა ელიზბარაშვილმა.

"რადიო თავისუფლების" ინფორმაციით, ცხოველთა უფლებადამცველის, ბიზნესმენ თამაზ ელიზბარაშვილის საქმეში პროსამთავრობო ტელეკომპანია "იმედის" თანამშრომლები ფიგურირებენ.

"იმედის" პოდკასტის — "FAKE კონტროლის" წამყვანმა სოციალურ ქსელში განცხადებით დაადასტურა, რომ მას და თამაზ ელიზბარაშვილს სიტყვიერი შელაპარაკება მოუვიდათ. სისხლის სამართლის საქმის ფიგურანტები არიან ამავე პოდკასტის წამყვანები — ნიკა კლდიაშვილი და სანდრო გამსახურდია. სანდრო გამსახურდია სიუჟეტებს "იმედის კვირისთვისაც" ამზადებს. საქმის ფიგურანტი სხვა პირების ვინაობა ჯერჯერობით უცნობია.

ელიზბარაშვილის ადვოკატის განცხადებით, საქმეს შვიდი დაზარალებული ჰყავს. კუჭაშვილი ამტკიცებს, რომ ელიზბარაშვილი მათი საჩივრის საფუძველზე არ დაუკავებიათ და მათ მხოლოდ გამოძიებას მისცეს ჩვენება.

პროკურატურამ ელიზბარაშვილს სისხლის სამართლის ბრალი წარუდგინა, რაც ჯანმრთელობის დაზიანებისა და სიცოცხლის მოსპობის მუქარას გულისხმობს და ერთ წლამდე პატიმრობას ითვალისწინებს.

მეტი თამაზ ელიზბარაშვილის საქმეზე: