თბილისის ახლადარჩეულმა მერმა კახა კალაძემ განაცხადა, რომ მეტროს მოდერნიზაციის პროექტი დაიწყება. მისი თქმით, მეტროსადგურების რეაბილიტაციისთვის ყველა მიმართულებით დაიწყება მუშაობა.

"საუბარია სამ მიმართულებაზე: მეტროსადგურების რეაბილიტაციაზე, ვაგონების განახლებაზე ან შეიძლება ვიფიქროთ ახალი, თანამედროვე ტიპის ვაგონების შემოყვანაზე, რომელსაც ექნება 50-წლიანი გარანტია; ასევე, აუცილებელია კომუნიკაციების - ელექტროგაყვანილობა, საჰაერო, სახანძრო და წყალსაქაჩი სისტემების მოწესრიგება".

კალაძის განმარტებით, საზოგადოებრივი ტრანსპორტის ერთიანი დიზაინის შემუშავებისთვისაც დაიწყება მუშაობა. მისივე თქმით, უახლოეს პერიოდში მეტროპოლიტენი ორი დღით დაიკეტება, რათა რამდენიმე მეტროსადგურში მიმდინარე სარეაბილიტაციო სამუშაოები დასრულდეს.