პრემიერი ირაკლი კობახიძემ მამუკა მდინარაძის პოლიტიკიდან წასვლა პოლიტიკურ საქმიანობასთან დაკავშირებული ფსიქოლოგიური სტრესითა და გადაღლით ხსნის. ამის შესახებ მან 27 აგვისტოს ჟურნალისტებთან საუბრისას თქვა.

"გეგმები იცვლება ხოლმე. ჩვენ ყველას ერთად, არა მხოლოდ მას, გვქონდა კონკრეტული გეგმა, თუმცა საბოლოო ჯამში მან მიიღო განსხვავებული გადაწყვეტილება. მისი დამოკიდებულება იყო ის, რომ დამღლელია ის საქმიანობა, რომელშიც ჩვენ ყველა ვართ ჩართული. არ ვგულისხმობ ფიზიკურ დაღლას, ვგულისხმობ ფსიქოლოგიურ სტრესს, რომელიც პოლიტიკურ საქმიანობასთან არის დაკავშირებული. ამაზე გვქონდა ჩვენ მსჯელობა. საბოლოო ჯამში ჩვენთვის გასაგები და გასაზიარებელი აღმოჩნდა ის პოზიცია, რაც ჰქონდა", — განაცხადა კობახიძემ.

ამასთან, კობახიძემ ქვეყნისა და გუნდის წინაშე გაწეული საქმიანობისთვის მამუკა მდინარაძეს მადლობა გადაუხადა.

"მინდა მადლობა გადავუხადო მამუკა მდინარაძეს, მის მიერ გაწეული მნიშვნელოვანი საქმიანობისთვის, მისი სამსახურისთვის ქვეყნის წინაშე, მისი დამსახურებისთვის გუნდის წინაშე. ის ათი წლის განმავლობაში უამრავ რამეს აკეთებდა, რაც საბოლოო ჯამში, აისახა ქვეყნის განვითარებაზე და ჩვენი გუნდის გაძლიერებაზე. შესაბამისად, მას ეკუთვნის მხოლოდ და მხოლოდ მადლობა. ჩვენთვის სამწუხაროა ის გადაწყვეტილება, რომელიც მან მიიღო. ჩვენ გვქონდა შეხვედრა გუშინ, ასევე დღეს, მათ შორის გვქონდა კონსულტაციები ბიძინა ივანიშვილთან. ეს იყო მისი გადაწყვეტილება. ჩვენ ვცადეთ, ის დაგვერწმუნებინა საპირისპირო გადაწყვეტილებაში, თუმცა, მას მყარი პოზიცია ჰქონდა ჩამოყალიბებული. კიდევ ერთხელ მადლობას გადავუხდი მამუკა მდინარაძეს, იმისთვის, რაც მას აქვს გაკეთებული და ძალიან ბევრი რამ აქვს გაკეთებული როგორც ქვეყნისთვის, ისე გუნდისთვის", — განაცხადა ირაკლი კობახიძემ.

გუშინ, 28 აგვისტოს, მთავრობის ადმინისტრაციაში გამართულ ბრიფინგზე რეგიონული განვითარების მინისტრმა, მამუკა მდინარაძემ განაცხადა, რომ თანამდებობას ტოვებს და პოლიტიკიდანაც მიდის.